Mbërritja e pandemisë në Shqipëri do të shoqërohej me probleme të shumta në fushën e arsimit. Mësues që infektoheshin dita-ditës (infektohen ende!), vështirësi në mësimdhënien virtuale, nga sigurimi i internetit te rënia e produktivitetit dhe shumëçka tjetër. Teksa kushtet janë të pazakonta, detyrimet e nxënësve dhe studentëve janë të njëjta. Duhet të paguajnë tarifat, e sigurisht të kryejnë testimet përktëse. Ndër to, përfshirë edhe provimet e Maturës Shtetërore.
Në një kohë kur e ndjekin mësimin nga shtëpia, maturantët u druhen tezave. E ftuar në emisionin e mëngjesit në “Wake Up”, Drejtoresha e përgjithshme e Qendrës së Shërbimeve Arsimore, Rezana Vrapi tha se testi i maturës do të jetë i përzier, pra do ketë pyetje me alternativa dhe me zhvillim, si dhe 80% e tij do të jetë në nivelin e parë dhe të dytë.
“Do të jemi ekstremisht të kujdesshëm në çdo element të testit. Një pjesë e madhe të pyetjeve do të jenë në nivelin e parë dhe të dytë. Pra 80% e gjithë testit është në nivelin e parë dhe të dytë, lehtësisht mund ta marrin notën 8. Është test i përzier. Do kthehemi në variantet që janë kthyer në lloj tradite, me alternativa dhe me shtjellim. Në total janë 60 pikë dhe një maturant që të kalojë duhet të marrë 25 pikë. Nota 10 fillon te 53-pikëshi”.
Më herët, Ministrja e Arsimit, Evis Kushi deklaroi se provimet do të hartohen duke pasur parasysh edhe vështirësitë që kanë hasur nxënësit gjatë zhvillimit të mësimit online dhe mësimit të kufizuar në klasa. Testi i parë i Maturës Shtetërore pritet të zhvillohet më 3 qershor. Ekspertë ndërkombëtarë të mësimdhënies pranojnë hapur se pavarësisht sigurisë shëndetësore që mundëson, shkolla online ndikon në “performacën” studentore, çka lind nevojën e domosdoshme për studim të detajuar të tezës dhe zgjedhje të kujdesshme të pyetjeve, nisur nga rrethanat.
