Silvio Berlusconi është shtruar në spitalin San Raffaele në Milano mbrëmjen e së enjtes, më 3 shtator për shkak të një përkeqësimi të lehtë, kanë konfirmuar burimet e Corriere.it. Ish-kryeministri italian doli pozitiv në testin për koronavirusin të mërkurën më 2 shtator.
Gjatë një bisede me senatorët e partisë së tij, Berlusconi tregoi edhe gjendjen e tij shëndetësore dhe si e kishte përjetuar virusin, të cilin e quajti një ferr të vërtetë.
“Unë jam duke luftuar për ta kaluar këtë sëmundje, e cila është një ferr i vërtetë, është tmerrësisht e shëmtuar. Nga mijëra pacientë të ekzaminuar në San Raffaele, unë jam i pesti për nga ngarkesa virale. Bëra më të mirën time dhe shpresoj shumë që të mund të shërohem.”-është shprehur ai më herët.
Fatmirësisht, ish-kryeministri i Italisë ka arritur të dalë nga spitali dhe ka treguar për mediat gjendjen e tij shëndetësore. Ai e ka cilësuar virusin si sprovën më të rrezikshme që ka kaluar në jetë, ndërkohë që i ka bërë thirrje të gjithëve të bëjnë kujdes maksimal.
“Unë kapërceva momentet më të vështira. Secili prej nesh është i ekspozuar ndaj rrezikut të infektimit të vetes dhe të tjerëve. Bëj thirrje për përgjegjësi maksimale personale dhe sociale. Mendimet e mia shkojnë para së gjithash për familjarët që po vuajnë për njerëzit e afërt të tyre. Para se të sëmuresha vetë, kam marrë thirrje të shumta që të mos nënvlerësoja rrezikun. Unë përjetova vuajtjet e atyre që u sëmurën apo që janë ende të sëmurë nga koronavirusi.
Profesor Clementi studioi mostrën time dhe është befasuar nga madhësia e ngarkesës virale, më e larta midis mijërave të analizuara në laboratorët e San Raffaele. Tani jam në fazën e rimëkëmbjes së pneumonisë bilaterale, sëmundja që më bëri më të rrezikuar”- u shpreh Berlusconi.
