Një ditë e dhimbshme për Mimoza Ahmetin. Poetja dhe shkrimtarja ka njoftuar ndarjen nga jeta të babait të saj, duke i kushtuar një mesazh të gjatë dhe prekës në rrjetet sociale.
Marrëdhënia me të atin kishte qenë një temë për të cilën Mimoza kishte folur edhe gjatë eksperiencës në “Ferma VIP 3”. Ajo kishte treguar se babai jetonte në Shtetet e Bashkuara të Amerikës dhe se prej vitesh nuk kishin mundur të takoheshin, ndërsa kishte shprehur dëshirën që pas përfundimit të eksperiencës televizive të mund të ishte sërish pranë tij.
Në mesazhin e lamtumirës, Mimoza shkruan:
“Sot u shua një pjesë e zemrës sime… Sot humba babanë tim të shtrenjtë. Ka dhimbje që nuk mund t’i mbajë asnjë fjalë. Sot, përballë ikjes tënde, babi, edhe fjalët e mia heshtin.
Ti ishe një nga shtyllat më të forta të jetës sime, një pjesë e pandarë e asaj që jam. Në çdo hap që kam hedhur, në çdo arritje dhe në çdo gjë të mirë që kam ndërtuar, ka diçka nga ti, nga mësimet e tua, nga dashuria, mundi dhe sakrificat e tua.
Shpresoj që çdo gjë që kam arritur në jetë të të ketë bërë krenar. Shpresoj që, edhe atje ku s’mund të të shoh më, të jesh duke më parë dhe të ndiesh se gjithçka që ke bërë për mua nuk ka qenë kurrë e kotë.
Dhe tani që po shkon drejt asaj bote ku është edhe nëna ime, kam vetëm një lutje për ty: Kur ta takosh nënën, përqafoje fort për mua. Thuaji se më ka munguar çdo ditë dhe se dashurinë për ju të dy e kam mbajtur gjithmonë të gjallë në zemrën time.
Tani jeni përsëri bashkë… Dhe unë mbetem këtu, me kujtimet tuaja, me mallin dhe me një dashuri që nuk do të shuhet kurrë.
Ndoshta nuk mund t’ju kem më pranë, por do t’ju mbaj gjithmonë me vete në zemrën time, në shpirtin tim, në çdo fjalë të mirë që do të them dhe në çdo hap që do të hedh.
U prehsh në paqe, babi im.
Përqafoje nënën fort për mua… Dhe, nëse mundeni, më ruani të dy nga lart. Ju dua sot, nesër dhe përtej çdo kohe.
Përjetë vajza juaj.”
