Një lajm i dhimbshëm ka prekur DJ Dagz dhe familjen e tij. Babai i artistit, Naim (Limon) Gumnishta, është ndarë nga jeta pas një beteje të rëndë shëndetësore, gjatë së cilës prej disa ditësh ndodhej i intubuar në spital.
Vetëm pak ditë më parë, DJ Dagz kishte ndarë me ndjekësit një mesazh prekës, duke treguar se i ati ndodhej në ditën e tretë të intubimit dhe po luftonte për jetën.
Në rrëfimin e tij, artisti kujtonte se babai kishte qenë gjithmonë mbështetësi më i madh i karrierës së tij 17-vjeçare, veçanërisht në momentet më të vështira. Edhe kur problemet familjare e kishin bërë të mendonte të tërhiqej nga aktivitetet muzikore, i ati e kishte nxitur të vazhdonte.
Pavarësisht gjendjes së rëndë të babait, DJ Dagz tregoi se kishte vendosur të merrte pjesë në një event, duke besuar se kjo do të kishte qenë dëshira e tij.
“Sot babi është në ditën e tretë në intubim dhe në luftë me jetën dhe sot pikërisht është ajo dita që s’du me qenë pjesë në eventin e paraparë për sonte, po diçka brenda meje po më thotë ‘shko djali jem se kjo të bën të lumtur’”, shkruante ai, duke i kërkuar të atit të bëhej i fortë dhe të kthehej sa më shpejt pranë familjes.
Fatkeqësisht, vetëm pak ditë pas këtij mesazhi plot shpresë, familja ka njoftuar ndarjen e tij nga jeta.
Lajmi është bërë publik përmes një njoftimi familjar, të shpërndarë në rrjetet sociale edhe nga partnerja e DJ Dagz, Einxhel Shkira.
“Me zemër të thyer dhe pikëllim të thellë, ju njoftojmë se babai, bashkëshorti dhe vëllau ynë i dashur Naim (Limon) Gumnishta ka ndërruar jetë”, thuhet në njoftim.
Familjarët kanë bërë të ditur se ceremonia e varrimit do të zhvillohet të nesërmen, pas faljes së namazit të ikindisë, në varrezat e fshatit Begaj, në Vushtrri.
Një humbje e rëndë për artistin, i cili vetëm pak ditë më parë i drejtohej të atit me shpresën se do ta fitonte këtë betejë dhe do të kthehej sërish pranë njerëzve të tij.
