Kreu i Urgjencës Kombëtare, Skënder Brataj, ka ngritur alarmin për gjendjen e Covid-19 në vendin tonë.
Për “Euronews Albania”, ai është shprehur se në shumë raste, pavarësisht kryerjes së tamponit që ka rezultuar negativ, personat kanë qenë të infektuar me koronavirus.
Brataj bëri thirrje që gjithkush të bëjë kujdes, pasi fakti që tamponi ka rezultuar negativ s’do të thotë që personi nuk e ka virusin.
Kreu i Urgjencës shprehet se nëse të shfaqen shenja apo ke pasur kontakte me persona të infektuar, duhet të ruash distancën, të mos dalësh dhe të bësh shumë kujdes.
“Nëse virusi nuk kryen dëmtime nuk shfaqen simptoma ndaj edhe po të kryesh testim nuk del pozitiv. Ndaj është shumë e kujdesshme bërja e tamponit pasi një person pozitiv mund të dalë negativ dhe pas kësaj lëviz i lirshëm me këtë argument. Nëse je asimpotomatik është e vështirë që virusi të dalë nga kryerja e tamponit.
Një person që ka shenja dhe simptoma duhet ta konsiderojë veten të prekur dhe duhet të ruajë distancën dhe të mos dalë. Mos bërja e tamponit nuk duhet të justifikoi lëvizjen. Konsideroje veten të infektuar nëse ke shenja dhe ke qenë në kontakt me persona të infektua. Pasi një person mund të ketë ngarkesë të vogël virale, sa që nuk e kap as tamponi.”- u shpreh Brataj.
