Policia e Dibrës ka bërë me dije se pas denoncimit të bërë në lidhje me skandalin në Zyrën Arsimore Rajonale në Peshkopi, ka filluar procedimin penal për shpërdorim detyre ndaj drejtueses së DAR Peshkopi, Brikena Danit dhe ish-drejtorit të shkollës 9-vjeçare Selishtë, Avni Delishi.
Pas skandalit të publikuar në emisionin Stop, ku në të cilin thuhej se ish-drejtori i fshatit Selishtë, Avni Delishi, ishte larguar në Londër që në muajin Mars por vazhdonte të paguhej, policia ka proceduar ish-drejtorin dhe drejtuesen e Zyrës Arsimore në Peshkopi, Brikena Danin.
Njoftimi i policisë:
Specialistët e Seksionit për Hetimin e Krimit Ekonomik e Financiar në DVP Dibër kanë filluar procedimin penal në gjendje të lirë për shtetasit:
- D., 25 vjeç, banues në Selishtë, Dibër, ish-drejtor në shkollën 9-vjeçare Selishtë, i dyshuar për kryerjen e veprave penale “Vjedhja duke shpërdoruar detyrën” dhe “Shpërdorim i detyrës”.
- D., 39 vjeçe, banuese në Peshkopi, Dibër, me detyrë drejtore në Zyrën Vendore Arsimore Peshkopi, e dyshuar për kryerjen e veprës penale “Shpërdorim i detyrës”.
Procedimi penal ndaj shtetasve të lartpërmendur ka filluar pasi nga veprimet hetimore të kryera ka rezultuar se shtetasja B. D. ka paguar shtetasin A. D., gjatë periudhës që ai nuk ka qenë brenda territorit të Republikës së Shqipërisë. Sipas verifikimeve të kryera shtetasi A. D. është larguar nga territori i Republikës së Shqipërisë në vitin 2019 dhe ka përfituar paga në mënyrë të padrejtë.
Materialet hetimore u referuan në Prokurorinë pranë Gjykatës së Shkallës së Parë Dibër, për veprime të mëtejshme.
/GazetaReforma.com
