Janë zyrtarizuar datat për dy nga edicionet më të rëndësishme të historisë së çmimeve Oscar, përfshirë edhe jubileun e madh të 100-vjetorit. Lajmi është bërë i ditur përmes një postimi nga “Film Updates” në platformën “X”, duke ngjallur menjëherë interes të madh te publiku dhe industria e filmit.
Sipas njoftimit, ceremonia e 99-të e Academy Awards do të zhvillohet më 14 mars 2027, ndërsa një vit më pas, më 5 mars 2028, do të mbahet edicioni i 100-të, një moment historik që pritet të shënohet me një spektakël të veçantë dhe surpriza të shumta.
Të dyja ceremonitë do të organizohen në ikonikun Dolby Theatre në Los Angeles, vendi që prej më shumë se dy dekadash është kthyer në shtëpinë tradicionale të Oscars. Eventet do të transmetohen drejtpërdrejt nga rrjeti amerikan ABC në mbi 200 vende të botës, duke arritur një audiencë globale prej miliona shikuesish.
Megjithatë, këto do të jenë transmetimet e fundit të Oscars në ABC, pasi më pas ceremonia do të zhvendoset në platformën YouTube, duke shënuar një ndryshim të madh në mënyrën e shpërndarjes së një prej eventeve më prestigjioze në industrinë e argëtimit.
Ndryshime të rëndësishme priten edhe sa i përket vendndodhjes. Duke filluar nga edicioni i 101-të, ceremonia do të zhvendoset në Peacock Theater, ku parashikohet të qëndrojë të paktën deri në vitin 2039. Ky vendim vjen si pjesë e një partneriteti strategjik mes Academy of Motion Picture Arts and Sciences dhe kompanisë AEG, e cila menaxhon kompleksin L.A. Live.
Dolby Theatre, që prej vitit 2002 ka qenë mikpritësi kryesor i Oscars, ka bërë përjashtim vetëm në vitin 2021, kur për shkak të pandemisë COVID-19 ceremonia u zhvendos përkohësisht në Union Station në Los Angeles.
Me afrimin e 100-vjetorit, pritshmëritë janë më të larta se kurrë, ndërsa fansat dhe profesionistët e industrisë presin një edicion historik që do të përkujtojë një shekull të artit kinematografik.
