Bebat rrëzohen vazhdimisht dhe shqetësimi i prindërve është i madh. Dëmtimet nga rënia e bebit mund të variojnë nga një tronditje e lehtë e deri në fraktura të ndryshme, ndaj disa prej tyre kanë nevojë për një përkujdesje të lehtë ndërsa disa të tjerë kanë nevojë për vëmendje të menjëhershme mjekësore. Ndaj është shumë e rëndësishme për prindërit që të jenë të informuar për rreziqet e mundshme në mënyrë që të marrin vendimet e duhura në periudhë relativisht të shkurtër.
1.Si fillim zbuloni çfarë ka ndodhur
Mjekët kërkojnë të dinë se si ndodhi rrëzimi dhe çfarë dëmtimesh mund të ketë pësuar bebi. Laura Hagopian, një mjeke urgjence që ka trajtuar shumë dëmtime të bebeve që kanë rënë nga krahët e prindërve apo nga shtrati, thotë se është shumë e rëndësishme që mjeku të di lartësinë nga e cila ka rënë bebi. Nëse lartësia është më e madhe se 1 metër dhe bebi është më i vogël se 3 muajsh atëherë mundësitë që bebi të ketë pësuar një dëmtim janë më të larta.
2.Shikoni nëse vogëlushi është nxirë
Nxirjet janë një shenjë e “mirë” për të kuptuar nëse ka fëmija ka pësuar fraktura. Por jo domosdoshmërish nxirjet do të gjenden në vendin ku koka e bebit ka pësuar përplasjen. Kërkoni nëse ka shenja nxirje poshtë syve dhe prapa veshëve, pasi këto vende mund të jenë tregues të një hemorragjie të brendshme, gjë që kërkon vëmendje të menjëhershme mjekësore.
3.Kuptoni nëse bebi i humbi ndjenjat apo jo
Është shumë e rëndësishme që të kuptoni nëse bebi i humbi ndjenjat pas rënies apo jo. Kjo mund të jetë disi e vështirë për tu dalluar pasi bebet mund t’i humbasin ndjenjat edhe për vetëm pak sekonda, ndaj është e rëndësishme të dini nëse bebi filloi të qajë menjëherë pas rënies apo pak pasi u rrëzua. Nëse bebi bie dhe nuk qan menjëherë, tregon që për pak momente ai ka qenë pa ndjenja. Në raste të tilla kërkohen teste të menjëhershme dhe pas kësaj bebi mund të ketë nevojë për një kujdes mjekësor.
4.Vëzhgoni sjelljen e bebit
Nëse bebi përjeton humbje ndjenjash apo të vjella atëherë ai ka nevojë për kujdes mjekësor, por ka edhe disa ndryshime të tjera në sjelljen e tij që mund të jenë po kaq serioze.
Nëse pasi është qetësuar, vogëlushi juaj merr biberonin dhe pi normalisht atëherë ka shumë mundësi që të mos ketë pësuar asgjë, por nëse ai është letargjik apo i irrituar, atëherë mund të ketë diçka që nuk shkon. Bebet që kanë dëmtime në brendësi të trurit shpeshherë nuk kanë simptoma si të vjellat apo humbjet e ndjenjave. Frakturat dhe dëmtimet e trurit tek bebet mund të shkaktohen dhe nga përplasjet e lehta, ndaj është e rëndësishme t’i kushtoni vëmendjen e duhur sjelljes së tij.
