Mjekët shqiptarë janë vënë këto muaj në një presion të shumëfishtë pas goditjes nga Covid-19 dhe barrës së lartë të sëmundjeve rutinë, të cilat Shqipëria i ka në nivele të larta rajonale edhe në situata normale.
Sikundër raporton Ministria e Shëndetësisë, numri i rasteve të reja rritet çdo ditë e më shumë, e bashkë me to edhe shtrimet në dy spitalet Covid, ku aktualisht po trajtohen 255 pacientë të konfirmuar pozitivë me Covid-19.
Mbrëmjen e djeshme ‘Top Story’ ka transmetuar një dokumentar sa i përket mungesës së stafit mjekësor. Me pagën më të ulët në rajon, mjekët shqiptarë kanë gjetur parajsën kryesisht në Gjermani, duke bërë që një nga degët më të kërkuara, siç është mjekësia, të braktiset.
“Po iu japim një shembull konkret! Tek infektivi kishim këtë vit 15 kuota për specializantë të rinj, u mbush një kuotë prej 7 vetash dhe prej tyre vetëm 2 pranuan të vazhdojnë këtë lloj specializimi. Studentët e mjekësisë dhe të infermierisë, dhe punonjësit e tjerë të shëndetësisë po e shikojnë zgjidhjen e jetës së tyre jashtë vendit dhe kjo është një fatkeqësi. Që të kthehet kjo në të mirën tonë, që ata ta shohin veten këtu duhet të ndryshojnë krejtësisht politikat.” u shpreh Gent Stroni, mjek.
Shqipëria me numrin më të ulët të mjekëve për banorë në rajon
iconstyle.al prej kohësh ka ndjekur me shqetësim situatën në vend, duke ngritur disa pikëpyetje sa i takon përballimit të valës së dytë të Covid-19.
Të gjithë jemi të vetëdijshëm se sistemi shëndetësor publik vuan nga numri i pamjaftueshëm i profesionistëve. Sipas të dhënave nga Observatori Global i Shëndetit, Shqipëria ka numrin më të ulët të mjekëve për banorë në rajon. Greqia ka 6.2 mjekë për 1000 banorë, Maqedonia 2.8, Mali i Zi 2.3, Serbia 2.4 dhe Bosnja 1.8 mjekë për 1000 banorë.
Aktualisht janë 1.2 mjekë për 1000 banorë dhe raporti mami/infermierë është 3.6 për 1000 banorë, teksa edhe këto burime të pakta njerëzore në shëndetësi janë shpërndarë në mënyrë të pabarabartë. Indeksi i Europian Shëndetit (EHCI) për vitin 2018 vuri në dukje se Shqipëria ka burime shumë të kufizuara të kujdesit shëndetësor, duke theksuar se vuan nga një strukturë shëndetësore e vjetruar, me një raport të lartë dhe të kushtueshëm të kujdesit në pacient për kujdesin jashtë-pacientit, thuhen në vlerësim.
Sakaq, fakti që një pjesë e madhe e personelit mjekësor u infektua nga Covid-19 (zyrtarisht nuk kemi një numër) duket se e ka bërë të vështirë menaxhimin e situatës. Burime të sigurta pranë Infektivit kanë treguar për iconstyle.al se mjekë e infermierë, jo të fushës, janë detyruar nga instancat përkatëse për tu bërë pjesë e stafit të shërbimit infektiv, madje burimet shtojnë se janë kërcënuar edhe me heqje të licensës së infermierit.
Sa pak paguhen mjekët
Në fund të muajit korrik revista “Monitor”, botoi një vështrim krahasues të pagave në vendet e rajonit tonë për vitin 2019. Paga mesatare në aktivitetin e “Shëndetësia dhe veprimtari të tjera sociale” në Shqipëri është 435 euro, është afërsisht sa gjysma e mesatares rajonale. Vitin e kaluar, edhe Kosova i rriti ndjeshëm pagat e mjekëve dhe infermierëve, me synim ndalimin e eksodit të bluzave të bardha.
Burimi: Institucionet statistikore përkatëse, përpunime të Monitor
Megjithatë, analiza e studime të shumta e rendisin shumë keq Shqipërinë në përfundimet e tyre, sa i përket trajtimit të bluzave të bardha. Instituti i Vienës për Studime Ekonomike Ndërkombëtare arriti në përfundimin se në Shqipëri, ata që kujdesen për shëndetin e njerëzve paguhen më pak se 20% e asaj që paguhen të njëjtat profesione në 15 vendet më të zhvilluara të Bashkimit Europian.
Asnjë vend tjetër i Europës apo Ballkanit Perëndimor nuk ka një normë kaq të ulët sa vendi ynë dhe askush nuk zbret nën 20%. Pra, në linja më të përgjithshme, me pagën që merr në Shqipëri, një mjek dhe infermier shqiptar mund të blejnë diçka më shumë se 15% të asaj që blejnë kolegët e tyre, në Finlandë, dhe diçka më pak se 10% të asaj që blejnë kolegët e tyre në Luksemburg. Duket se kjo është edhe një prej arsyeve kryesore të valës së largimit të këtyre profesionistëve nga vendi ynë dhe i gjithë rajoni gjatë viteve të fundit.
Mungesa e pajisjeve në spitale
Pacientët nuk kanë nevojë për mure të lyer dhe shiringa, por për pajisje serioze. Prej muajsh kemi nxjerrë në pah disa pajisje që i duhet me urgjencë sistemit tonë shëndetësor.
Një ndër to është ECMO, një pajisje e kujdesit intensiv, shumë e vlefshme për të shpëtuar jetët e pacientëve të intubuar, që në vendin tonë nuk gjendet, por fatlumët udhëtuan drejt Turqisë për tu kuruar. Kjo pajisje kushton rreth 60-70 mijë euro dhe konsiderohet si pajisja e fundit e “mrekullive” në mjekësinë moderne. (KLIKO)
