Ditën e sotme në media u raportua se një 72-vjeçari të infektuar me Covid-19 në Tiranë, i ka plasur bombola e oksigjenit në banesë. Ngjarja është regjistruar rreth orës 21:05 të mbrëmjes së djeshme në Bulevardin “Bajram Curri”.
Pas incidentit të ndodhur në banesën e tij, ai është dërguar me spital për mjekim më të specializuar për shkak se kishte nevojë të merrte oksigjen. Policia njofton se nga kjo ngjarje nuk ka të lënduar të tjerë ndërkohë që po punohet për sqarimin e plotë të rrethanave të ngjarjes.
Së fundmi, “Abc News” ka zbardhur detajet, duke raportuar se në momentin e incidentit ai ka qenë në banesë bashkë me familjarë të tjerë të cilët menjëherë kanë nxjerrë jashtë bombolën e oksigjenit. Por në momentin që ata kanë dalë jashtë është mbyllur edhe dera e shtëpisë e cila është e blinduar.
Në këtë çast ata janë detyruar të lajmërojnë forcat zjarrfikëse dhe uniformat blu. Ndërkohë më pas pacienti i cili kishte nevojë për oksigjen është dërguar në Spitalin Infektiv ku po vijon të marrë trajtim mjekësor.
Por si sigurohen bombolat e oksigjenit nga pacientët me Covid-19?
Po e njëjta media shkruan se ato merren në rrugë informale. Kryesisht pacientët i marrin ato nga qytetarë të tjerë që janë shëruar nga koronavirusi dhe vendosin t’i lëshojnë me qira. Një pjesë e tyre mbushen pa autorizim dhe pa protokoll.
