Doni t’i tregoni mikut tuaj filmin që patë, por nuk ju kujtohet titulli! Kjo është një nga ato situatat e zakonshme, që na ndodh të gjithëve, por tani ka një zgjidhje.
Të gjithë i harrojmë titujt sado që mund të jemi në gjendje të përshkruajmë të gjithë subjektin e filmit. Tani, një motor kërkimi i ndihmon harraqët të gjejnë titullin e filmit. Funksionon njësoj si “Shazami” që gjen titujt e këngëve duke u nisur nga disa nota muzikore.
“What is my movie” quhet programi i realizuar nga një ekip finlandez i universitetit Oulu. Janë shpenzuar 650 mijë dollarë vetëm për të bërë realizuar këtë projekt. Teknologjia e përdorur të lejon të analizosh çdo sekuencë të filmit për të kuptuar se për cilin film bëhet fjalë. Mjafton të kesh vendin e xhirimit, një nga skenat apo dialogët dhe në pak sekonda, “What is my movie” do të të jap informacionin që të duhet!
Përdorimi është fare i thjeshtë, mjafton të vendosësh një fjali përshkruese, për shembull “Sean Connery ka veshur pantallona të kuqe” dhe enigma do të zgjidhet menjëherë!
Burimi: Hypebeast
