Ndonëse nga e hëna masat e izolimit do të lehtësohen duke lejuar qarkullimin me autorizim deri në orën 17.30, kjo fundjavë do të vijojë me masa të shtrënguara.
Kryeministri Rama pak minuta më parë ka zbuluar masat për të shtunën dhe të dielën, të cilat do të jenë të ngjashme me dy fundjavat e kaluar.
Siç njofton kryeministri, të shtunën lëvizja me autorizim do të bëhet deri në orën 13:00, ndërsa të dielën, vendi do të jetë sërish në shtetrrethim, çka do të thotë se askush, përveç atyre me leje të posaçme për shërbime të domosdoshme si mjekët apo efektivët e policisë, nuk mund të dalin nga shtëpitë.
Gjithashtu, ai ka njoftuar se lejet për pazar do të vijojnë të jenë 90 minuta, si të shtunën, ashtu edhe javën e ardhshme.
“Pak nga pak e me durim, do të dalim me kokën lart nga kjo luftë”-është shprehur kryeministri në postimin e tij në rrjetet sociale.
Këto lehtësime vijnë në një kohë të rënies drastike të rasteve të reja të infektimit me COVID-19 në Shqipëri.
Sipas ekspertëve të shëndetësisë, rreziku më i madh për vendin tonë tashmë ka kaluar, ndaj dhe ka ardhur momenti që gradualisht të lehtësohen masat e izolimit të popullsisë, që mesa duket kanë dhënë rezultatin e tyre.
Deri më tani në Shqipëri ka pasur 24 viktima nga koronavirusi dhe në total, 416 të infektuar.
