Autoriteti i Konkurrencës më në fund është zgjuar nga “gjumi letargjik”, duke bërë një kontroll të beftë në depot farmaceutike në vend.
Pas ‘kontrollit’ të Autoritetit të Konkurrencës, janë gjobitur rreth 24 depo farmaceutike, për arsyen e rritjes së çmimeve dhe bllokimit të tregut.
AK është vendosur në’ lëvizje’ duke filluar hetimet, në dukje thjesht kalimtare, të depove farmaceutike për maskat, dezinfektantët dhe alkoolin, duke paralajmëruar se nëse shkeljet do të vijojnë, atëherë depot do të gjobiten sa 10% e xhirove të tyre vjetore.
Mësohet se 10 depo farmacautike janë gjobitur me 10 milionë lekë, ndërsa 14 depo farmaceutike të tjera janë gjobitur me dy milionë lekë, shuma këto krejt të papërfillshme duke marrë parasysh abuzimin për të cilin akuzohen.
Oligopol me testet serologjike
Iconstyle.al denoncoi që në korrik kartelin që organizuan laboratoret private në kryerjen e testeve serologjike dhe për këtë i bëmë thirrje edhe Autoritetit të Konkurrencës, por nuk morrëm kurrë përgjigje! (KLIKO)
Në mënyrë të qartë dhe në shumicë institucionet rregullatore të tregjeve dhe Autoriteti i Konkurrencës, që lidhet drejtpërdrejtë me çështjen, dhe që paguhen nga taksapaguesit shqiptarë për të mbrojtur interesat publike, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni. (Kujto: sektorët financiarë, të sigurimeve, telekomunikacioneve, bankarë, karburanteve, etj.)
Sidomos në raste të tilla, ku vihet në lojë shëndeti i shqiptarëve në një kohë pandemie, është e papranueshme që AK nuk ka ndërmarrë paraprakisht masa për të ndaluar rritjen e njëkohshme në grup të çmimeve të testeve serologjike dhe njëkohësisht nuk ka njoftuar publikun në zbatim të detyrimeve të tij ligjore kundër marrëveshjeve të ndaluara të dyshuara të tipit “kartel” nga biznese në tregje të rregulluara.
Afër apo larg faljes së oligopolit të radhës?
Vetëm pak ditë më parë ju bëmë me dije se AK u mjaftua vetëm me disa rekomandime për kompanitë celulare, duke anashkaluar kështu vjedhjen haptazi të këtyre operatorëve, pas oligopolit të shkurtit. (KLIKO)
Ky vendim tregon dhe haptazi lojën e Autoritetit, ku “me një sy qorr e një vesh shurdh”, i mban punët mirë me operatorët telefonikë që vetëm vjedhin dhe rrisin fitimet në kurriz të shqiptarëve.
Po ashtu, (AK), ka të regjistruar edhe një tjetër precedentë të zvarritjes së ankesave dhe hetimeve. Një prej hetimeve që bëri bujë e që u harrua, ishte edhe nisja e hetimeve nga ana e Autoritetit në lidhje me tregun e materialeve mjekësore si maska alkool, etj., që janë tepër të domosdoshme në pandeminë që po kalojmë.
Pra, pasi Autoriteti i Konkurrencës mbylli hetimin në lidhje me oligopolet e kompanive telefonike dhe ka lënë zvarrë shumë çështje të tjera, se besim mund të kemi ne se nuk do të tolerojë edhe mbylljen e hetimit për depot farmaceutike?!
Autoriteti i Konkurrencës ka vendosur një precedent negativ, i cili ka tendencë që ta përsërisë veten në çdo hetim sensitiv, siç ishte edhe rasti me oligopolin e kompanive farmaceutike, apo me klinikat private që bënin shërbimin e testit serologjik për Covid-19.
