Emisioni investigativ “Fiks Fare” zbuloi mbrëmjen e djeshme se në “shoqatën artistike”, të rregjistruar me emrin “Ferdinand Deda” me qendër në Tiranë, kërkoheshin vajza për sekretare, por në të vërtetë ato rekrutoheshin si prostituta në lokalet e natës në Maqedoni. Përmes numrave të kontaktit të bërë publik njoftimet online, vajzat kontaktonin me Shpëtimin, kryetarin e kësaj shoqate, i cili i premtonte një rrogë prej 1200 euro dhe më pas i transferonte vajzat në Maqedoni.
Fill pas skandalit, ka reaguar ashpër në “Facebook” edhe Elton Deda, djali i të madhit Ferdinand Deda. Ai i premton të atit të ndjerë se do të heq përjetësisht lidhjen e emrin të tij me këtë aktivitet, si dhe falenderon emisionin që solli në vëmendje këtë fenomen.
“I dashur Baba, Nder i Kombit dhe muzikanti gjeni. Më në fund të erdhi edhe ty radha që në 15-vjetorin e vdekjes, të dalësh në TV, jo me baketën tënde në dorë, por fytyra jote e pashme e stampuar në një vulë shoqate e cila merret me prostitucion dhe eskorta. Sesi eshte legalizuar kjo shoqatë në gjykatë nuk e di, por me siguri kanë harruar të kërkojnë pëlqimin tënd meqënëse ti ke lëvizur për pak kohë jashtë shtetit. Gjithashtu edhe për ne familjarët e tu, harruan të na kërkojnë një autorizim të përkohshëm derisa të vije ti. Meqë të erdhi shpirti në majë të hundës dhe vendose të mos ktheheshe, këta vendosën të të kujtojnë duke të respektuar dhe duke i vënë emrin tënd të nderuar një shoqate. Mbase po të kishe vendosur të rrije edhe mund të kishe përfituar diçka nën dorë, pa zhurmë dhe mbase kishe mbyllur ndonjë vrimë në portofol. Të premtoj që do bëj ç’është e mundur (pasi e di që shumëpak prej baballarëve të kombit do t’u interesojë ta ndjekin këtë çështje), ta heq përjetësisht fytyrën tënde të hijshme nga ajo vulë dhe nga ai aktivitet i ndyrë. Nuk mund të rri pa falenderuar Fiks Fare që e solli në vëmendje këtë fenomen. Do flasim prapë babi, qëndro i fortë! Yt bir.” – shkruan ai.
