Është shënuar viktima e tretë në 24 orët e fundit nga koronavirusi, ndërsa lista e plotë që nga fillimi i pandemisë në mars, numëron 66 jetë të humbura.
Ministria e Shëndetësisë bën me dije se një pacient 86-vjeçar nga Shkodra, i cili po trajtohej në terapi intensive prej 12 ditësh nuk e ka fituar dot betejën me COVID-19, megjithë asistencën e madhe mjekësore.
Ministria i shpreh ngushëllime familjes së të ndjerit dhe i kujton edhe një herë qytetarëve të tregojnë kujdes me respektimin e rregullave, distancimin fizik, përdorimin e maskës, higjienën vetjake, për të kufizuar përhapjen e COVID19.
Nga fillimi i epidemisë, 66 qytetarë të konfirmuar me COVID-19 e kanë humbur betejën me virusin e rrezikshëm.
Gjatë paradites u raportuan dy viktima, një 74-vjeçare nga Shkodra dhe një 82 vjeçare nga Tirana, të cilat vuanin nga disa sëmundje bashkëshoqëruese.
Aktualisht në spitalin infektiv po trajtohen 71 pacientë, 10 prej tyre janë në terapi intensive, ndërsa 2 janë të intubuar në gjendje të rëndë.
Ndërkohë gjatë 24 orëve të fundit janë kryer 269 testime për të dyshuar të prekur me Covid19, nga të cilat janë konfirmuar 45 raste pozitive.
/Iconstyle.al
