Dy raste të reja të personave të infektuar me koronavirus janë shënuar në Kosovë, duke çuar kështu në 63 numrin e personave të infektuar.
Instituti i Shëndetësisë Publike të Kosovës (IKSHPK) ka bërë të ditur sot se rastet e konfirmuara pozitive janë raste kontakti të gjinisë femër, njëra me vendbanim në fshatin Vrapçiç-Gjilan e moshës 25 vjeçe dhe tjetra me vendbanim në fshatin Studime e ulët-Vushtrri e moshës 73 vjeçe.
“Pas marrjes së mostrave të 42 personave që kanë qenë në kontakt të afërt me pacientë të infektuar me koronavirus, është konfirmuar edhe për dy persona tjerë të prekur me këtë sëmundje”, thuhet në njoftimin e IKSHPK, përcjell Telegrafi.
Nga data 08.02.2020 deri më 24.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 732 mostra të dyshimta në virusin SARS-CoV-2 dhe prej tyre, gjithsej gjashtëdhjetë e tre (63) raste kanë rezultuar pozitive, me një (1) rast të vdekjes i një të moshuari 82 vjeç, njofton IKSHPK.
