Hapësirat për ekspozimin e verpave të artistëve shqiptarë nuk kanë qenë asnjëherë të mjaftueshme dhe herë pas here kjo gjë shtrohet si problem prej tyre. Madje edhe ato pak salla që janë për të ekspozuar punët e tyre duket se shfrytëzohen nga palë të treta, as nga artistët e as nga shteti, por nga ambasada të huaja.
Piktori i njohur Helidon Haliti ka ngritur së fundmi një shqetësim në lidhje me këtë çështje. Ai shprehet se nuk mundet të hapë një ekspozitë personale në Muzeun Historik Kombëtar, sepse gjithmonë salla e madhe rezulton e zënë nga të huajt. Sipas tij artistët shqiptarë lihen jashtë vëmendjes dhe të huajve ju kushtohet më shumë rëndësi. Ai thotë se është e padrejtë që artistëve shqiptarë nuk ju krijohen mundësitë dhe hapërsirat e duhura nga institucionet për të shprehur veten.
“Unë kam një koncept për ekspozitën, që është për te salla e madhe te Muzeu Historik Kombëtar, pra te salla e ekspozimit. Unë ekspozitë personale, që në vitin 2012 nuk kam bërë më. Kur u interesova te MHK më thanë që u fut Ambasada Çeke, dhe tolerova sepse pata dhe disa probleme më ndodhën dhe fatkeqësi. Më pas te MHK për të gjetur një datë tjetër, por m’u tha që 11 me 18 nëntor tek korridori. Drejtori më tha atje, sepse është Ambasada Franceze dhe nuk ka mundësi”, është shprehur piktori për gazeta “SOT”.
Mungesë menaxhimi nga drejtuesit e instituiconeve
Sipas piktorit të mirënjohur sot artistët e kanë të pamundur të ekspozojnë në Galerinë Kombëtare të Arteve për shkak të problemeve me titullarin e institucionit. Ai e konsideron fyes faktin që atyre ju mbyllen dyert, ndërsa ambasadat e huaja mund t’i zënë sallat në çdo kohë për çdo lloj aktiviteti.
“Në muze është e vetmja sallë ekspozimi. Të fyen fakti se si këta janë skllavëruar, jo ambasada, jo ky aktivitet apo një tjetër. Por çfarë do të thotë kjo? Për artistët shqiptarë nuk ka hapësira dhe janë të huajt. Jam një autor që kam 8 vjet pa ekspozitë personale. Në MHK mund të thoshin për shembull kjo sallë është e lirë edhe në 13 mars, por jo të më vësh mua në korridor, sepse sallën e kanë të huajt”,thotë Helidon Haliti.
Nga ana tjetër piktori shprehet se mungesa e një menaxhimi të mirë nga ana e institucioneve ka sjellë këtë problem, që prej kohësh është shqetësues për të gjithë artistët në vend. Ai thotë se për dy vite është përgatitur për ekspozitën personale dhe si përfundim nuk i jepet asnjë lloj mundësie për ta hapur atë.
“Është sallë ekspozimi, nuk kam punë me aktivitetet e MHK. Problemi është që aty është një sallë ekspozimi dhe e vetmja sot në Shqipëri, që do një menaxhim profesional. Unë kam dy vjet që punoj për një ekspozitë personale dhe dua patjetër që të dal me një shqetësim artistik”, thotë piktori.
Sallat e ekspozitave nuk janë mbyllur nga pandemia këto kohë si institucinet e tjera të artit, mirëpo dhe kjo që ka mbetur si e vetmja mundësi për artistët e vendit nuk po funksionon siç duhet!
