Biznesi i kirurgjisë plastike po njeh rritje të frikshme në vendin tonë. Bazuar në deklarimet që kanë bërë pesë spitalet kryesore, xhiroja e tyre është rritur me 80% përgjatë vitit të shkuar, ndërsa fitimi llogaritet në normën e 30%.
Në një investigim të revistës Monitor, rezulton se shqiptarët janë “fiksuar” pas ndërhyrjeve plastike, duke sjellë edhe shtimin e spitaleve që e ofrojnë këtë shërbim.
Të dhënat zyrtare nga bilancet e kompanive tregojnë për një rritje dyshifrore të të ardhurave që kanë qarkulluar klinikat që kanë në fokus të aktivitetit kirurgjinë estetike.
Vetëm në vitin 2015, një nga klinikat më të njohura në Shqipëri deklaroi të ardhura prej 148 milionë lekësh (rreth 1.1 milionë euro), me një rritje prej 47% me bazë vjetore.
Fitimi para taksave, nga ana tjetër, është një tregues i fortë se ky biznes po përjeton momentin e tij më të mirë të rritjes.
Kostot e një operacioni variojnë nga pjesa e trupit.
Mesatarja e ndërhyrjes në hundë varion nga 1200 në 1700 euro, gjoksi nga 2000 deri në 3500 euro dhe fundshpina nga 2000 deri në 2800 euro. Por përveç shqiptarëve, vitin e fundit janë shtuar edhe të huajt, kryesisht italianët, që vijnë në Shqipëri për të kryer ndërhyrjet estetike./Monitor
