Rusia ka shprehur shqetësim të thellë lidhur me çdo mundësi të përfshirjes direkte ushtarake të Shteteve të Bashkuara në konfliktin mes Izraelit dhe Iranit, duke e cilësuar një veprim të tillë si të rrezikshëm për stabilitetin rajonal.
Zëvendësministri i Jashtëm rus, Sergey Ryabkov, deklaroi se çdo lloj ndihme ushtarake e drejtpërdrejtë ndaj Izraelit, përfshirë edhe deklaratat publike që mund të nxisin tensione, do të kishte pasoja serioze. “Ne i kemi paralajmëruar ata, mos e mendoni as si ide. Një veprim i tillë do ta destabilizonte ndjeshëm gjithë situatën,” u shpreh ai në një intervistë për mediat ruse.
Deklarata vjen në një moment kritik, pas përshkallëzimit të dhunës mes Izraelit dhe Iranit, ku për disa ditë rresht të dy vendet kanë shkëmbyer sulme ajrore me pasoja të rënda në njerëz dhe infrastrukturë. Konflikti nisi pas një sulmi të gjerë ajror të Izraelit mbi objektiva në territorin iranian, që sipas Tel Avivit kishte në shënjestër programin bërthamor të Teheranit.
Përplasja ushtarake midis dy fuqive rajonale ka nxitur reagime të shumta ndërkombëtare, ndërsa Moska kërkon të frenojë çdo përfshirje shtesë që mund të zgjerojë më tej konfliktin.
