Një 77-vjeçari nga Rahoveci, i infektuar me COVID-19, ka ndërruar jetë mëngjesin e sotëm, duke e çuar numrin e viktimave në 28.
Lajmin e ka bërë të ditur Klinika Infektive sipas së cilës, pacienti ka pasur edhe sëmundje kronike të veshkave dhe ka qenë në dializë.
“Sot në ora 10:30, ka ndërruar jetë pacienti i lindur me 1943 nga Rahoveci, i cili përveç infeksionit me Covid -19 ka pasur edhe sëmundje kronike të veshkave dhe ka qenë në dializë”.
Muajin e fundit në Laboratorin e Mikrobiologjisë Molekulare në IKSHPK janë testuar gjithsej 9.279 mostra të dyshimta në virusin SARS-CoV-2 dhe prej tyre pozitive rezultojnë gjithsej 861 raste.
Numri i përgjithshëm i të shëruarve deri më sot është gjithsej 561 raste, ndërsa deri tani janë shënuar 28 viktima, me sëmundje të tjera shoqëruese.
Ndërkohë, Ministria e Shëndetësisë në Kosovë ka ndryshuar rregullat për të riatdhesuarit.
Personat që vijnë nga jashtë nga sot e tutje, do të qëndrojnë shtatë ditë në karantinë, në Qendrën e Studentëve në Prishtinë. Në ditën e shtatë ata do t’i nënshtrohen testit për Koronavirusin dhe nëse dalin negativë, do të vetëizolohen në shtëpi për 14 ditë.
“Të gjithë personat SARS CoV-2 POZITIV, pa shenja klinike të mbahen në izolim deri në shërimin e plotë të tyre (sipas OBSH dy teste radhazi negative së paku 24 orë e më së largu 48 orë) e nëse kanë shenja dhe simptoma të rënda klinike të hospitalizohen në Klinikën Infektive. Të gjithë personat SARS CoV-2 NEGATIV, rekomandohet të vetë-izolohen në shtëpi 14 ditë sipas udhëzimeve të IKSHPK”, thuhet në njoftim
/Telegrafi
