Të paktën 27 persona kanë humbur jetën si pasojë e përmbytjeve shkatërrimtare që goditën Qarkun Kerr në Teksas, pas reshjeve të rrëmbyeshme të shiut që përmbytën zonën me shpejtësi të frikshme. Mes viktimave janë 9 fëmijë dhe 18 të rritur, sipas autoriteteve vendore.
Një ndër viktimat e konfirmuara është Renee Smeistrala, një vajzë 9-vjeçare që ndodhej në Kampin Mystic, një kamp i njohur veror për vajza të krishtera, që u përfshi plotësisht nga përmbytjet. Kampi ndodhet buzë lumit Guadalupe, i cili doli nga shtrati pas një rritjeje dramatike të nivelit të ujit, afro 8 metra për më pak se një orë, për shkak të mbi 300 mm reshje, që përbëjnë një të tretën e sasisë vjetore të shiut në zonë.
Të paktën 20 vajza të tjera që ndodheshin në të njëjtin kamp rezultojnë ende të zhdukura, ndërsa forcat e kërkim-shpëtimit janë në terren duke zhvilluar operacione intensive për t’i gjetur. Mbi 700 fëmijë ishin të pranishëm në kamp në momentin e katastrofës.
