Jay-Z është një ndër reperët që nuk del shpesh në intervista.
Në këtë pikë të karrierës së tij, ndërkohë që është nominuar 8 herë në çmimet Grammy-s, përfshi këtu, kënga, albumi dhe regjistrimi më i mirë i vitit, ai ka dalë vetëm një herë në një bisedë publike, pas daljes së albumit të ri.
Por New York Times ka arritur që të intervistojë reperin dhe të nxjerrë prej tij një sërë “sekretesh”, që fansat mezi prisnin t’i dëgjonin.
Redaktori ekzekutiv i NYT Dean Baquet, në një bisedë me reperin, e pyeti për marrëdhënien me Beyonce (Lexo Këtu), albumin e ri 4:44 dhe sigurisht raportin me mikun e ngushtë Kanye West, për të cilin, ju fansat mund të rrini të qetë.
“Kur është hera e fundit që ke folur me Kanye West”?
“Fola me Kanye ditën që shkoi, vetëm për t’i thënë atij, sepse është vëllai im, e dua Kanye, me të vërtetë. Është një marrëdhënie e komplikuar mes nesh. Jemi të dy artistë. Gjithmonë ka qenë si një konkurrencë e vogël me vëllain e madh”.
Jay Z tha se imagjinon një kohë kur tensionet e tanishme mes dyshes, të marrin fund, megjithatë pranon se “ka disa gjëra që ndodhën, që nuk janë vërtet të pranueshme për të”.
“Në këtë marrëdhënie të gjatë, shpresojmë që kur të jemi 89 vjeç, të qeshim me këto 6 muaj apo çfarëdo kohe të kaluar. Më kupton ku e kam fjalën? Ka mosmarrëveshje në një marrëdhënie që duhet t’i kalojmë. Dhe e vetmja mënyrë për ta arritur këtë është që të ulemi, të bisedojmë dhe të themi: “Këto janë gjërat që më vënë mua në siklet. Këto janë gjërat që janë të papranueshme për mua. Jam i sigurt se ai ndjen që edhe unë i kam bërë gjëra të tilla atij. Më kupton? Këto janë: Unë nuk jam një qenie njerëzore e përsosur. Ju e dini”.
I pyetur nga Baquet sesa i përfshirë është Kanye në këtë gjë, Jay-Z tha:
“West është një person shumë i dhembshur. Dhe shumë herë ai hyn në probleme duke u përpjekur të ndihmojë të tjerët. Kështu që e pranoj këtë. Vetëm se ekzistojnë gjëra të caktuara që nuk janë vërtet të pranueshme për mua. Dhe ne vetëm duhet të flasim për këtë. Por (mes nesh) ka dashuri të sinqertë”.
