Ashtu sikundër pritej vjeshta ka ardhur së bashku me valën e dytë të pandemisë dhe shifrat e larta të viktimave dhe të të infektuarve janë rikthyer.
Shumë shtete europiane kanë nisur rimbylljen, teksa kontineti i vjetër është rikthyer sërish në epiqendrën e virusit pas disa muajsh me shifra të ulëta.
Ditën e djeshme në vendin tonë u raportua një rekord i ri infektimesh 489 raste të reja dhe 6 viktima.
Sakaq, numri i të shtruarve në spitalet Covid ka shkuar në 350, teksa spitali Infektiv i ka plotësuar kapacitetet.
Në këtë mënyrë, të gjithë po pyesnim nëse në vendin tonë do ndodhin kufizime për shkak të situatës, ashtu siç po ndodh me fqinjët tanë apo me shtetet e tjera europiane.
Ndonëse, anëtarët e Komitetit Teknik të Ekspertëve kanë deklaruar në intervista të ndryshme se izolimi total nuk shihet si mundësi, nga java e ardhshme qeveria ka në plan të vendosë masa kufizuese.
Çfarë pritet të ndodhë?
Duke nisur nga e hëna pas orës 20:00 çdo gjë në vend do paralizohet, shkruan Dosja.al.
Baret, lokalet dhe restorantet do të mbyllen, ndërkohë që edhe qytetarët nuk do lejohen që të qarkullojnë në rrugë. Po ashtu, pritet të merren edhe masa të tjera kufizuese që do bëhen me dije për qytetarët ditën e diel.
Kujtojmë se Kosova ka nisur tashmë kufizimin pas shifrave rekord, duke mbyllur gjithçka gjatë fundjavës përveç farmacive dhe furrave të bukës. Ndërsa, gjatë ditëve të javës mbyllja do të nisë nga ora 20:00 deri më 05:00 të mëngjesit.
