G Banin kishim kohë pa e dëgjuar me ndonjë këngë të re, deri tre muaj më parë kur publikoi këngën e re “Mjet Anglez”.
Reperi i suksesshëm i viteve ‘2000 ishte sot i ftuar tek emisioni “Ftesë në 5” në “Top Channel”, ku zbuloi se përveç publikimit të videos ka në plan të rikthehet aktiv edhe në skenën e muzikës. G Bani u shpreh se ka menduar edhe për mbrëmje në klubet e natës edhe pse sipas tij, menaxherët e këtyre klubeve nuk e meritojnë ta kenë pasi G Bani duhet konsideruar legjendë.
“Sigurisht jam i uritur për skenë, dua të dal në skenë. Do u jap rastin edhe organizatorëve të klubeve që nuk e meritojnë të më kenë. S’ e meritojnë, sepse unë e di shumë mirë impaktin tim, unë jam legjendë!”
G Bani u bë i njohur në fillimin e viteve ‘2000, kur bashkë me Crazy Girl-in por edhe grupin Familja nga Jugu në Veri, me reperë shqiptarë Shqipërie të cilët bënin muzikë paralelisht me tregun e repit të Kosovës, që deri atëherë kishte qenë më i zhvilluar.
“Mund të jetë hera e parë që po e them, po unë e di që jam legjendë, jo vetëm falë arritjeve të mia, por sepse kështu erdhën gjërat. Unë bëra rep, në një Shqipëri ku s’ishte bërë rep herë tjetër”, u shpreh G Bani.
Në 2008-ën, G Bani publikoi albumin e tij të parë, “Punë të pastra”, i cili mund të jetë albumi i parë rap i një artisti në Shqipëri.
