Jeni bërë nëna dhe tashmë është koha që t’i riktheheni punës! Por asgjë nuk ka ndryshuar lidhur me përfitimet tuaja financiare dhe jo vetëm. Një studim i realizuar së fundmi në Mbretërinë e Bashkuar tregoi se edhe pasi femrat kthehen në punë pasi bëhen nëna fitojnë më pak se bashkëshortet e tyre. ja se si mund të zbutet ndryshimi i përgjegjësive mes burrave dhe grave:
Jo vetëm gratë, por edhe burrat duhet të marrin leje
Mënyra më e mirë që bizneset t’i përkrahin më tepër nënat e reja është: leja prindërore të ndahet mes të dyve. Në kohën kur burri merret me përkujdesjen ndaj fëmijës, nëna i rikthehet punës, bën edhe orë shtesë dhe kështu fitohen më shumë para. Kujtojmë që Suedia e ka inkurajuar këtë vendim qysh prej vitit 1974 dhe tani po ndërmerret një nismë e re, që i lejon baballarët të marrin një pushim 3-mujor në shtëpi.
Financimi i kujdesit për fëmijët
Kostoja e kujdesit për fëmijët mund të jetë e kripur për shumë familje, sidomos për nënat me paga të ulëta, duke patur parasysh edhe ligjin që mbulon vetëm shpenzimet e kujdesit për fëmijët deri në 3 vjeç. “Kuptohet që shumica e nënave dhe baballarëve duan të kalojnë më shumë kohë në shtëpi me të vegjlit e tyre. Por, të paktën 600.000 prej atyre që rrinë në shtëpi, do të preferonin të punonin nëse do të mundnin”, pohoi Sophie Ëalker, liderja e Partisë për Barazinë e Grave në Angli.
Fëmijët të lejohen të mbahen në zyrë
Kur politikania italiane Licia Ronzulli mori në Parlamentin Europian vajzën e saj 6-javëshe në shtator të 2010-s, fotoja bëri xhiron e botës. Ajo shpjegoi se marrja me vete e foshnjës Viktoria në votime “nuk ishte një gjest politik, por mëmësor”, pasi ajo e kishte ende atë në gji. Në Shtetet e Bashkuara të Amerikës, kompanitë kanë filluar ta marrin parasysh këtë fakt, me politikat e “bebes në punë”, që po kthehet një trend në rritje. Me rëndësi është edhe që prindërit të jenë të gatshëm për të qenë pranë fëmijës sa herë ai qan, në mënyrë edhe që të mos kthehen në bezdi për kolegët e tjerë. Po ashtu prindërit duhet ta kenë të qartë që përgjegjësitë e tyre lidhur me fëmijën, ndikojnë në bërjen e punës.
Prindërit mund të punojnë nga shtëpia
Në një botë ku posta elektronike dhe teknologjia e komunikimit po mbretëron, krijohet më lehtë mundësia për të punuar nga shtëpia. Sipas statistikave të Shkollës së Biznesit në Londër dhe Universitetit të Kalifornisë, të mos qenit i pranishëm në zyrë mund të ndikojë në mundësitë që i jepen dikujt për rritjen në detyrë dhe rezultati mund të lidhet me performancën e ulët në krahasim me kolegët e tjerë “të stacionuar” aty.
Pagesa më të larta për nënat e reja
Në qershor, Universiteti i Essex njoftoi për rritjen e pagave të profesoreve femra, në mënyrë që rroga e tyre mesatare të shkojë në të njëjtin nivel me kolegët meshkuj. Dhe universiteti nuk është zëri i vetëm në këtë fushatë. “Brainlab”, një agjenci marketingu në Londër, po ashtu votoi për rritjen e pagave të grave me 8.6 %. Drejtoresha e kompanisë shpjegoi se asnjë nga punonjësit e saj nuk u ankuan për këtë politikë: “Nuk mendoj se kjo është e padrejtë për burrat. Burrat janë përballur me këtë problem për shekuj me radhë dhe vetëm këto kohë kemi filluar të flasim sesi mund ta bëjmë vendin e punës më të barabartë dhe të lumtur”.
T’i rritet vlera punëve që paguhen pak
Studimet treguan se gratë shihen më tepër në pozicione të paguara ulët. Punët e bëra kryesisht nga gratë si: pastrimi dhe kujdesi “janë paguar tradicionalisht më pak sesa punët e bëra nga burrat, si ndërtimi apo transporti, duke lënë të kuptohet që “punës së burrave” përgjithësisht i jepet më shumë rëndësi si në aspektin ekonomik, ashtu edhe në atë social”.
Burimi: BBC
