I njohur për serenatat e tij korçare, këngëtari Stefi Prifti ka thënë troç dhe ashpër disa të vërteta përsa i takon fushës së artit, muzikës, sportit etj.
Sipas tij vendi ynë me bollëk ka vetëm diçka: Politikën dhe politikanët e prandaj gjërat kanë ngelur në vend numëro.
Ai shprehet ndër të tjerash se në tregun shqiptar ka shumë pak krijimtari. Ka rënë numri i këngëtarëve dhe këngëve të reja, pavarësisht se kemi shumë talente sipas Priftit. Madje bëhet pak ose aspak për promovimin e tyre në arenën botërore.
Mbështetja financiare, por edhe marketimi për artistët e rinj apo sportet e ndryshme nuk janë në fokus të shtetit, pohon Stefi në një status të gjatë që ka ndarë në rrjetet sociale.
Më poshtë reagimi i plotë:
Heshtje!
Sa pak krijimtari! Sa pak këngëtarë dhe këngë të reja në tregun shqiptar!
Sa pak mundësi për të arritur suksesin talentet e reja! Vetëm kur ju duhen për tu shfrytëzuar, vetëm atëherë lançohen dhe trumbetohen me të madhe… pastaj hidhen në plehra….! Nuk promovohen dhe nuk ju krijohet mundësia për tu integruar!
Varfëri (heshtje) në manaxhim dhe marketim! Varfëri (heshtje) në mbështetje financiare! Varfëri (heshtje) shpirtërore dhe humanizmi inekzistent… dhe ai i biznesit, zero.. 0!
Heshtje! Varfëri! Qetësi vrastare..!
Duket sikur gjërat kanë ngelur në vend numëro..! Nuk ka struktura dhe mekanizma për të organizuar dhe vënë në lëvizje çështjet e artit dhe të sportit! Nuk ka struktura dhe mekanizma për tu integruar apo për të qenë më shumë sesa shqiptare. Mos ju duket çudi! Ne kemi shumë talente, por nuk kemi asnjë “trampolinë lidhëse” me Europën dhe botën, as me Ballkanin nuk kemi! Jemi si të shkëputur..! Jemi të paorganizuar dhe në këtë gjendje që ndodhemi ndihemi inferiore, “vrasin babanë”… për të shkuar në Eurovizion fest, i vetmi event që na lidh me botën..! Mbeten vetëm përpjekjet personale dhe individualë të disa artistëve, sportistëve apo individë të talentuar shqiptar në fusha dhe profesione të ndryshme, që me shumë sakrifica dhe mundime arrijne suksese kudo në botë dhe na bëjnë krenarë.
Po shteti ç’bën për ta?
A ka struktura këtu në mbështetje të këtyre talenteve?
A ka fonde ky shteti ynë për të promovuar apo studiuar talente shqiptare në shkollat europiane?
Dhe, nëse nuk ka shteti, si ka mundesi që jemi i vetmi vend (ndër vendet e zhvilluara dhe emancipuara), që nuk ka shoqata, organizma humanitare, filantrope me qëllime madhore, mbështetjen e njerëzve të varfër, së pari, por edhe të talenteve që premtojnë shumë dhe ta kthejnë investimin duke ngritur lart flamurin dhe emrin Shqiptar.
Në vendin tonë flitet shumë pak për artin! Muzikën shqiptare, kinematografinë shqiptare, pikturën shqiptare, teatrin, letërsinë.. prozën dhe poezinë..! Shumë pak flitet edhe për sportet! Përjashto futbollin dhe kulturat e tjera sportive thuajse nuk egzistojne. Ç’bëhet keshtu? Dikur lulëzonte basketbolli e volejbolli, peshengritja, qitja, atletika… garat nga më të ndryshmet etj etj. Një larmi sportesh që sot thuajse nuk ekzistojnë apo janë krejtësisht në hije, pa asnjë interes! Si ka mundësi? Nëse jeton për pak kohë në një shtet tjetër si në USA apo Europë, menjëherë kupton (kujton..), sa shumë detaje na mungojnë, sa shumë bosh e kemi jetën..!
Vetëm një gjë e kemi me bollëk të madh! POLITIKEN DHE POLITIKANET!
Në ekrane “të mbysin”! Ç’do stacion televiziv shqiptar ka, mbi 50% të programit me emisione politike!
Vërtet mendoni se nuk ka asgjë tjetër më të mirë për të bërë?
Vërtet duhet të besojmë, se askush nuk mund të jetoje jetën pa interes për politikën?
Vërtet duhet të besojme se gjithçka është e varur nga politika? Këtu në Shqipërinë tonë, po.
Edhe për sa kohë do të heshtim akoma?
