Një libër për rritjen para dhe pas rënies së komunizmit në Shqipëri ka fituar komente pozitive në perëndim, por ka nxitur kritika “të egra” nga një pakicë e zëshme e shqiptarëve, thotë autorja e librit Lea Ypi.
Në muajin e parë të plotë të shitjes në nëntor, libri me kujtime shiti 10,000 kopje. Është përzgjedhur në listën e ngushtë për biografinë e vitit të Costa dhe së shpejti do të jetë në dispozicion në 17 gjuhë, duke përfshirë koreanisht.
Pavarësisht kritikave të tij për ndikimin katastrofik të ndryshimeve të tregut në Shqipëri, libri mori vlerësime me pesë yje në Daily Mail dhe Daily Telegraph dhe u emërua libri i vitit në Sunday Times.
Por në Shqipëri libri gjeneroi një kritika të shumta në internet, saqë Ypi iu desh t’u bënte thirrje shqiptarëve që të ndalonin dërgimin e mesazheve “fyese, akuzuese dhe shpifëse” ndaj saj.
Ajo tha për “The Guardian” se zakonisht i pëlqente të merrej me kritikët e saj. Por ajo tha se ky abuzim ishte ndryshe sepse vinte nga njerëz që ose nuk e kishin lexuar librin ose e kishin keqkuptuar kritikën e saj ndaj kapitalizmit dhe komunizmit.
Libri tregohet nga këndvështrimi i saj si fëmijë në Shqipërinë e viteve 1980, kur ajo u mësua të adhuronte diktatorin Enver Hoxha dhe pikëpamjet disidente të familjes së saj u bënë të qarta vetëm pas rënies së regjimit.
