Pas javësh me aludime dhe pikëpyetje rreth marrëdhënies së tyre, Sarah Berisha ka konfirmuar për herë të parë publikisht se historia e dashurisë me DJ PM ka marrë fund.
E pyetur nga një ndjekës në Instagram nëse vazhdon të jetë në një lidhje me DJ PM, Sarah vendosi t’u japë fund njëherë e mirë spekulimeve.
“Jo, ne nuk jemi më bashkë. U bë disa muaj që jemi ndarë (shumë përpara se të dilte lajmi). Disa gjëra janë të shkruara për të mos zgjatur gjithmonë, por e mira është që kur marrin fund të ruajmë respekt për njëri-tjetrin”, shkroi ajo.
Sarah shtoi se zgjodhi të fliste edhe për shkak të publikut që e ka ndjekur dhe mbështetur çiftin që nga “Big Brother VIP Albania”, ndërsa bëri të qartë se nuk ka ndërmend ta diskutojë më tej ndarjen:
“Këtë temë s’do ta hap më”.
Konfirmimi vjen pasi prej kohësh në rrjet qarkullonin zëra se Sarah dhe PM nuk ishin më bashkë. Dyshimet u shtuan kur ndjekësit vunë re se ata nuk ndiqeshin më në Instagram. Vëmendje tërhoqi edhe fakti që Sarah u shfaq e vetme në “Sunny Hill Festival”, ndërsa në Instagram publikoi këngën “The One That Got Away” të Katy Perry, e cila flet për një dashuri të humbur.
Deri tani, asnjëri prej tyre nuk kishte konfirmuar ndarjen. Madje, gjatë viteve, mungesa e fotove së bashku kishte prodhuar disa herë thashetheme të ngjashme, ndërsa DJ PM kishte deklaruar se preferonte që marrëdhënien ta mbante private.
Sarah Berisha dhe DJ PM u njohën në vitin 2021 gjatë eksperiencës së tyre në edicionin e parë të “Big Brother VIP Albania”, ku nisi edhe afrimiteti mes tyre. Historia vazhdoi jashtë shtëpisë për disa vite, duke i kthyer në një prej çifteve më të njohura të krijuara në reality show.
Këtë herë, megjithatë, nuk bëhet më fjalë për aludime: Sarah e ka konfirmuar vetë se lidhja ka përfunduar prej disa muajsh, duke zgjedhur ta mbyllë publikisht historinë me një mesazh respekti për ish-partnerin.
