Ditën e sotme, pasi mori pjesë në Komisionin Parlamentar për Edukimin, ministrja e Arsimit Evis Kushi iu përgjigj pyetjes së deputetëve, se përse nuk është bërë testim masiv për Covid-19 në radhët e mësuesve të shkollave në arsimin parauniversitar.
Duke iu shmangur pyetjes dhe duke ia ngarkuar përgjegjësinë autoriteteve shëndetësore, ministrja Kushi theksoi se ISHP po punon në lidhje me gjurmimet e kontakteve.
Gjatë fjalës së saj në Komisionin Parlamentar për Edukimin, Kushi u shpreh se edhe nëse do të testoheshin të gjithë mësuesit, 48 orë më pas ata do të shfaqnin sërish shenja në rast se do të ishte i infektuar.
Gjithashtu lidhur me mësuesit që rezultuan pozitivë me koronavirus në dy shkollat e kryeqytetit, ministrja tha se tashmë situata është kthyer në normalitet, duke theksuar se tashmë mësuesit e infektuar janë zëvendësuar.
“Nuk është ndjekur kjo strategji por e ndjekjes dhe e gjurmimit të kontakteve. Edhe nëse do testonim të gjithë mësuesit 48 orë më pas ata do shfaqnin shenja. Depistimi masiv nuk është element i kapjes në kohë të rastit.
Në rastet kur ka raste pozitive izolohen nxënësit që kanë pasur kontakte me të infektuarit dhe jo e gjithë klasa. Vetëm në rast se kemi infektim masiv në një klasë mund të kalohet online për një periudhë të caktuar.
Mësimi në shkollën Emin Duraku kur disa mësues ishin me Covid, vazhdon normalisht. Mësuesit pozitivë janë karantinuar. Po ashtu edhe të shkollës në Paskuqan”, ka thënë në Komision ministrja Kushi.
Por sa e sinqertë është treguar ministrja e Arsimit në lidhje me problematikën e shkollave të cilat kanë staf pedagogjik të infektuar me Covid-19?
Më e udhës do të ishte që ministrja e Arsimit të mos shmanget nga pyetjet e sikletshme dhe të heqë dorë nga propaganda se gjithçka në sistemin arsimor prashkollor, parauniversitar dhe universitar në këto kohë pandemie po shkon vaj.
Iconstyle.al ka këmbëngulur gjithmonë se çerdhet, kopshtet, shkollat e të gjitha niveleve arsimore, nuk duhet të hapen pasi do të kthehen në vatra gjeneruese të reja të infeksionit të Covid-19.
Kujtojmë se qeveria dhe ministria e Arsimit, u bazuan në vendimin e hapjes së shkollave vetëm për shkak të rezultatit të disa sondazheve ku prindërit e fëmijëve, specifikisht sidomos mamatë, kanë kundërshtuar sistemin e platformave online mësimore, për shkak të parregullsive dhe mosfunksionimit të tyre.
Në thelb, ministria e Arsimit me hapjen e shkollave, tentuan që të fshehin dhe dështimin spektakolar të të gjithë këtij institucioni në sistemin mësimor me anë të platformave online.
Ndërkohë që shkollat po bien “njëra pas tjetrës” sikur të ishin “birrila”, pasi stafet pedagogjike po konstatohen pozitivë me Covid, ku jo më larg se sot u regjistruan edhe dy shkolla të tjera të mbyllura dhe që po zhvillojnë mësimin online, ministrja Kushi dhe vartësit e saj propagandojnë të kundërtën duke thënë se çdo gjë është në kontroll.
Shpresojmë që kjo neglizhencë dhe makutëri, mos t’i kthehet në bumerang ministrisë së Arsimit, duke shkërmoqur propagandën e saj porsi një “kështjellë prej rëre”./Iconstyle.al/
