Gjatë ditës së sotme janë konfirmuar edhe dy raste të reja me Covid-19 në Kosovë.
Kështu, numri total i të infektuarve ka shkuar në 35.
Instituti Kombëtar i Shëndetësisë Publike në Kosovë ka njoftuar se nga 20 mostrat e dyshuara për virusin COVID-19, dy prej tyre kanë rezultuar pozitiv.
Sipas njoftimit zyrtar, dy rastet janë një 4-vjeçar nga fshati Petrovë komuna e Shtimës, dhe një 39-vjeçare nga Prishtina.
Njoftimi zyrtar
“Sot me 23.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar njëzet (20) mostra të dyshimta për virusin SARS-CoV-2 dhe dy (2) prej tyre janë pozitive.Dy prej rasteve pozitive janë raste kontakti njëri me vendbanim nga fshati Petrovë komuna e Shtimes, e gjinisë mashkull me moshë 44 vjeç dhe tjetra me vendbanim në Prishtinë nga komuna e Prishtinës e gjinisë femër e moshës 39 vjeç. Nga data 08.02.2020 deri me 23.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 604 mostra të dyshimta në virusin SARS-CoV-2 dhe prej tyre, gjithsej tridhjetë e pesë (35) raste kanë rezultuar pozitive. Nga data 01.02.2020 deri me 23.03.2020 në Aeroportin ndërkombëtar “Adem Jashari” si dhe në pikat tokësore kufitare janë depistuar gjithsej 16.756 udhëtarë. Në Aeroportin “Adem Jashari” 1.015 udhëtarë, Merdare 5.202, Vërmicë 4.395, Jarinje 1.188, Dheu i Bardhë 985, Hani i Elezit 2.157, Kullë 1.070, Qafë Morinë 47, Bërnjak 499, Qafë Prush 35, Muçibabë 162 dhe Glloboçicë 1 udhëtar,”
Gjithashtu, në Kosovë është shënuar edhe viktima e parë nga Covid-19.
Viktima ishte 82 vjeç, i lindur në Dumnicë të Podujevës dhe vuante nga sëmundje kronike të zemrës dhe mushkërive.
Ai ishte infektuar nga djali dhe vajza e tij të cilët gjithashtu janë pozitivë.
