Një person rom është dhunuar sot rreth orës 17:00 në Ferizaj.
Sipas shkrimeve të disa mediave të Kosovës, personi në fjalë është grua dhe motivimi pas dhunuesve është se ajo shikohet si e rrezikshme, ndërsa të tjerë shkruajnë se njerëzit e akuzojnë se rrëmben fëmijë të vegjël.
Nuk është hera e parë që i ndodh diçka e tillë.
Po i njëjti person ka rënë pre e dhunës pak ditë më parë në Lipjan, ndodhi e cila pasi u shpërnda në internet, shkaktoi reagimet e para të opinionit publik.
Sipas të dhënave të Policisë së Kosovës, të publikuara tek “Kallxo.com”, bëhet fjalë për një grua e cila është riatdhesuar nga Belgjika në vitin 2011.
Gruaja me inicialet Z.S është rome nga Podujeva dhe është shoqëruar dy herë në polici. E megjithatë, sipas zëdhënëses së policisë së Gjakovës Lirije Podrimaj, ajo nuk gjendet e kërkuar nga policia dhe nuk dyshohet për asnjë aktivitet kriminal.
Ndërkaq, mediat raportojnë se gruaja ndodhet aktualisht në polici pas dhunimit të pakmëparshëm në Ferizaj, mirëpo për aq informacion sa është përditësuar, nuk ka pranuar të flasë.
“Fillimisht kemi marrë informacion për një sulm ndaj një qytetari në sheshin e Ferizajt. Njësitë relevante kanë dalë në teren dhe pastaj është kuptuar se është gruaja në fjalë. Ajo gjendet momentalisht në stacionin policor, por që nuk po flet fare.”, u shpreh zëdhënësi Mehmet Hajdini.
