Sara Hoxha dhe Ledion Liço vijnë për herë të parë në një intervistë të përbashkët, si burrë e grua, për të zbuluar disa të pathëna për jetën e tyre.
Kështu moderatori ka marrë rolin e një gazetari për të intervistuar partneren për revistën “Who”.
Çifti ka zbuluar disa detaje “top secret”, si kush iu vardis kujt apo momentin kur për pak u ndanë.
Epo që ta dini të gjithë, ishte Ledioni ai i cili iu vardis Sarës, dhe madje i tha Ii pari “të dua”. Sara flet edhe për periudhën kur lidhja e tyre u bë publike, dhe ata qëndruan 3 ditë të ndarë, deri kur ajo e kuptoi që nuk bënte dot pa të:
L: Le të tregojmë pak për kush ju vardis kujt?
S: Ti mua!!!
L: Pra, nuk ishte dashuri me shikim të parë? (qesh)
S: Jo, ishte dashuri pas 15 vitesh.
L: Po kur e kuptove ti që ishte dashuri, sepse unë të kam thënë i pari të dua.
S: Pooo, dhe unë në fillim ta thashë si përgjigje duke menduar se atë duhet të thoja. Nuk jam e sigurt nëse e ndjeja atëherë kur ta thashë për herë të parë. Por e kuptova 100% kur shkova në Londër dhe nuk rrija dot pa ty.
L: Pra ti s’më mendoje mua përpara?
S: Jo, fare (qesh). Unë isha në fazën që po vazhdoja shkollën në Londër, u dobësova, më kishte hipur vetja në qejf. Lidhja jonë erdhi në një kohë kur unë nuk e shikoja jetën time në Tiranë, gjithë planet i kisha të ikja.
L: A do e tregosh momentin që ne gati jemi ndarë?
S: Kur historia jonë u bë publike dhe doli në çdo faqe online, unë isha në gjendje shoku. Nuk isha gati. Isha vetëm 18 vjeç, në një lidhje me dikë 10 vite më të madh se unë, që punonte tek kompania e familjes sime. Jemi ndarë për 3 ditë. Atëherë mendoja që ky ishte fundi. Une isha një njeri shumë privat, ndërkohë kush nuk më shkruante për këtë histori. U futa në gojën e të gjithëve brenda natës, ishte e papritur dhe nuk e kapërdija dot.
L: Po kush mendon se e ka vuajtur më shumë publikisht dhe profesionalisht bërjen e lidhjes publike?
S: Ti më shumë se unë, sinqerisht. Dhe për këtë më vjen keq. Por vetë zgjodhe gocën e pronares (qesh).
