Rasti tragjik i 25-vjeçares Jetlira Foniqi, e cila humbi jetën në Malishevë teksa priste të bëhej nënë, ka prekur edhe këngëtaren Rina Balaj.
Pas protestës ku familjarë dhe qytetarë kërkuan drejtësi për të renë, Rina reagoi përmes disa postimeve në Instagram, duke u ndalur veçanërisht te pamjet e nënës së Jetlirës.
“Sot nuk mujta me e pa këtë nanë në protestë pa mu thy zemra. Një nanë që ka rritë një vajzë me krejt dashninë e botës, sot del në rrugë e thyme, me kërku drejtësi për fëmijën e vet. Për vajzën e saj që duhej me qenë gjallë. Për vajzën e saj që priste me u bo nanë vetë”, shkroi këngëtarja.
Rina u shpreh se dhimbja e një prindi që detyrohet të varrosë fëmijën e tij është e pamundur të përshkruhet, ndërsa shtoi se pamjet nga protesta e kishin prekur thellë.
“Pamja e saj sot ma këputi shpirtin. Një nanë nuk duhet kurrë me dalë në rrugë me lyp drejtësi për vajzën që ia kanë vra. Zoti ia lehtësoftë sadopak këtë dhimbje që s’ka emër, e drejtësia mos e harroftë kurrë vajzën e saj”, vijoi ajo.
Këngëtarja sqaroi gjithashtu pse nuk kishte marrë pjesë fizikisht në protestë, pasi disa ndjekës e kishin pyetur për mungesën e saj.
“Jo çdo dhimbje e as çdo përkrahje duhet me u dëshmu me prezencë e me fotografi”, u shpreh Rina, duke theksuar se prania e një personazhi publik në një moment të tillë mund ta zhvendosë vëmendjen nga arsyeja e vërtetë e protestës.
“Sot nuk është dita për mu, as për asnjë figurë publike. Sot krejt vëmendja duhet me qenë te ajo nanë e thyme, te vajza e saj dhe te drejtësia që po kërkohet”, shkroi ajo.
Në fund, Rina theksoi se mungesa e saj në protestë nuk nënkupton mungesë solidariteti dhe se zemra e saj është pranë familjes së 25-vjeçares.
