Vështirësitë që po kalojnë fëmijët në Bulqizë për të siguruar bukën e gojës, ka tërhequr vëmendjen e shtypit italian, më saktë gazetares Alice Martinelli që punon në emosionin investigativ në Itali “Le Iene”.
Gazetarja publikoi në shtator të këtij viti një kronikë që e kishte realizuar në Bulqizë, lidhur me peripecitë që kalojnë fëmijët duke mbledhur maleve krom, ndryshe siç bëjnë moshatarët e tyre në vendet e tjera. Gazetarja shkruante në kronikën e saj:
“Timi, Blero dhe Gesti janë tre shokë të mirë. Kanë ëndrra prej fëmijësh, dashurojnë futbollin dhe janë tifozë të Leo Messit. Dëshira e tyre: të ngasin Ferrarin e reperit Noizy. Janë rritur përpara kohe sepse duhet të kontribuojnë në bilancin familjar dhe e bëjnë këtë çdo ditë, duke u kacavjerrë nëpër grumbuj gërmadhash të braktisura përreth minierave të qytetit të tyre. Për një kile gurë të pasur me krom do të fitojnë 0,10 euro. Kronika ime e mbrëmjes së djeshme për Le Iene”.
Por kryeministri Edi Rama këtë kronikë të gazetares së “Le lene” të realizuar në Bulqizë e ka quajtur si pjesë të kazanit mediatik përtej Adriatikut, duke përdorur një gjuhë jo të denjë për kronikën ashtu siç është ka mendimin dhe për një pjesë të medias shqiptare, një deklarim i tillë që jo pak ngjalli debat dhe komente në opinionin publik shqiptar.
E vënë në dijeni për këtë deklaratë të Ramës, Martinelli e ka ballafaquar kryeministrin tonë me faktet rreth xhirimeve, që ndryshe nga ç’pretendonte ai, janë realizuar në tetor të këtij viti. Pra një muaj më parë.
“Jam gazetarja që bëri reportazhin mbi fëmijët në Bulqizë që mbledhin krom për të ndihmuar familjet. Së pari ju falënderoj që na ndiqni, më vjen keq që nuk ju ka pëlqyer reportazhi, por mund të respektoj opinionin tim. Sa i takon deklaratës tuaj që reportazhi ynë ishte i falsifikuar, këtu nuk mund t’ju jap të drejtë. Mund t’ju jap datat kur kemi qenë në Bulqizë. Mbërritëm më 13 tetor 2017, pikërisht një muaj më parë dhe xhiruam intervista dhe filmime nga 14 deri më 16 tetor. Kemi fatura, rezervime në hotel, fotografi në telefonat tanë, mund t’jua tregojmë kur të doni. Mbi të gjitha unë jam filmuar në 90% të rasteve. Dhe kjo duhet t’ju mjaftojë që të kuptoni se xhirimet janë absolutisht të vërteta dhe aktuale. Para se të mbërrinim iu drejtuam disa gazetarëve të televizioneve lokale shqiptare, të cilët na treguan situatën e llahtarshme të Bulqizës dhe besoj se e keni parë dhe ju, sepse ju bëtë një xhiro kur lëshuat deklaratat mbi reportazhin tim dhe mbi programin tonë. Dhe ju do t’i keni parë ato pallate në gjendje strukturale dhe higjienike të dobëta, rrugët në errësirë sepse nuk ka energji elektrike dhe shpresoj të keni parë mirë emisionin tonë dhe fëmijët që vazhdojnë të mbledhin krom për të ndihmuar familjet të mbijetojnë. Unë uroj që ju tani të mund t’i ndihmoni këta fëmijë, ata për të cilët treguam historinë dhe për të tjerët që vazhdojnë të mbledhin krom që e shesin me 10 cent kilogramin.”
