Pas prezantimit të paketës financiare për individët dhe bizneset e prekura nga Covid-19, kryeminstri Edi Rama u shpreh se nuk është detyra e qeverisë të financojë ecurinë e mediave në vend, të cilat i cilësoi “humoristë”.
“Përsa i përket mediave, unë mendoj që nuk është detyra e qeverisë të financojë ecurinë e programeve komerciale. Detyra e qeverisë është që të garantojë minimumin jetik të medias përsa i përket lirisë së informacionit dhe të drejtës për informim”, u shpreh Rama më herët.
Pikërisht për këtë përjashtim të gazetarëve nga paketa e ndihmës financiare, gazetarja Ola Bruko i drejtoi pyetje Ministrit për Mbrojtjen e Sipërmarrjes, Eduart Shalsit.
Shalsi u shpreh se pavarësisht se puna e mediave vlerësohet në maksimum, nuk është mundësia për ta përfshirë atë në paketë.
Ola Bruko: Zoti Shalsi po ne gazetarëve pse nuk na konsideroni dhe të na përfshini? Pse nuk keni bërë asgjë për ne?
Eduart Shalsi: Nuk mund të thuash pse nuk na konsideroni. Është tjetër gjë kërkesa dhe dëshira, e tjetër gjë mundësia. Nuk është se s’ju konsiderojmë apo nuk jemi të shqetësuar për ju. Jemi. Jeni ndër katëgoritë e shumta që po bëni një punë të shkëlqyer gjatë kësaj kohe. Meritoni respekt për këtë. Por duhet edhe ne t’i bëjmë me kujdes llogaritë.
Ola Bruko: Ka kaluar një muaj e gjashtë ditë zoti Shalsi…
Eduard Shalsi: Një muaj e gjashtë ditë nuk është situatë kiameti. Jeni në vëmendjen tonë po aq sa janë të gjitha kategoritë. Nga ana tjetër na duhet të kalkulojmë mirë, dikush thotë jemi 6600, dikush thotë jemi 4000, dikush 2000, disa janë në të zezë. Unë dua të them diçka të fundit. Ua them ju e ua them të gjitha kategorive: Pulsi ynë rreh me pulsin tuaj.
Kujtojmë deklaratën e kryeministrit Rama i cili ka thënë: Nuk është detyrë e qeverisë të financojë programe komerciale. Ne garantojmë minimumin jetik, do shohim në vijim, duhet pritur radha. Ka njerëz në kushte të ekzistencës.
Burimi: Tiranapost.al
