Shumë ushtarë humbën ndjenjat si pasojë e temperaturave të larta në Mbretërinë e Bashkuar, teksa merrnin pjesë në Rishikimin e Kolonelit në Paradën e Gardës së Kuajve.
Pamjet e ushtarëve që binin përtokë bënë xhiron e rrjetit, ndërsa Princi William i ka falenderuar të gjithë për përkushtimin.
“Një falenderim i madh për çdo ushtar që mori pjesë në Revizionin e Kolonelit këtë mëngjes në vapë. Kushte të vështira, por të gjithë keni bërë një punë vërtet të mirë. Faleminderit. W”, shkroi William në Twitter.
Ushtarët po përgatiteshin për festimet e ditëlindjes së Mbretit Charles të shtunën e ardhshme. Në fakt, ai ka lindur në 14 Nëntor, por do ta festojë ditëlindjen dy herë në vit.
Monarkët që nuk kanë lindur në muajt e verës, festojnë dy herë sepse ka më shumë gjasa që moti të jetë i mirë për paradën Trooping the Color,që shënon festimin zyrtar për ditëlindjen e monarkut në Mbretërinë e Bashkuar.
