Një tjetër mjek ka ndërruar jetën si pasojë e Covid-19 në vendin tonë.
Sipas BalkanWeb, mjeku nga Kavaja, Sefer Dervishi, ka mbyllur sytë ditën e sotme pasi prej ditësh luftonte me të ashtuquajturin armik i padukshëm.
Mjeku Dervishi kishte më shumë se dy javë i shtruar te spitali Covid-2 “Shefqet Ndroqi”, teksa raportohet se vuante edhe nga disa sëmundje bashkëshoqëruese.
Mjeku i ndjerë shënon viktimën e dhjetë nga Covid-19 në radhët e bluzave të bardha. I pari që humbi betejën me koronavirusin nga personeli mjekësor ishte Arjan Pushi. Fatkeqësisht, saga e virusit vijoi më tej, duke u marrë jetën: Hysni Shkjau, Anibal Byberi, Pëllumb Zef Maletaj, Agron Menzelxhiu.
Ndërsa për pesë personat e tjerë, që kanë qenë pjesë e stafit mjekësor dhe në vijën e parë të frontit me luftën ndaj Covid-19, nuk ka pasur të dhëna të tjera.
Në përditësimin e sotëm, Ministria e Shëndetësisë bëri me dije se numërohen 65 të shëruar, 144 raste të reja, 3 humbje jete në 24 orët e fundit.
