Shoqata “Ferdinand Deda” me bazë në Tiranë, nëpërmjet njoftimeve “online” tregonte se kishte nevojë për të punësuar sekretare. Një investigim i emisionit “Fiks Fare” ka zbuluar se vajzat e punësuara, rekrutoheshin si prostituta në lokalë nate, në një qytet të Maqedonisë. Gazetarja e emisionit kontaktoi me këtë shoqatë, përmes numrit të bërë publik dhe menjëherë iu përgjigj Shpëtimi, kryetari i kësaj shoqate, i cili i shpjegoi se kriter për ta fituar vendin e punës është paraqitja e jashtme dhe të mos ketë impenjime familjare. Shpëtimi tha se kjo shoqatë menaxhonte një arenë artistike dhe se puna ishte në Maqedoni.
Pasi u takuan në një bar në Tiranë, Shpëtimi i tha se e kishte fituar vendin e punës.
“Nëse je pa impenjime është koha që ti të bësh lekë. 1.200 euro rrogë bazë, 40 euro çdo mbrëmje, plus bakshishe. Po të jesh gocë e zgjuar merr 70-80 euro bakshish”, shprehet Shpëtimi.
Kryetari i shoqatës për të parandaluar që vajza të ndërronte mendim, i kërkon të nisen menjëherë drejt Maqedonisë dhe të mos shqetësohej, pasi nuk do t’i hapej asnjë problem.
Shpëtimi i shpjegon gazetares se mban vulën dhe vendimin e gjykatës si kryetar i shoqatës “Ferdinand Deda” dhe se është gjithashtu edhe punonjës i cirkut. Këtë fakt, ai e përdor edhe në Doganë për të mos pasur probleme në kalimet e shumta që bën me femra të ndryshme.
Pas takimit me kryetarin e shoqatës, gazetarja niset të nesërmen në Maqedoni, së bashku me dy vajza të tjera që ishin prej kohësh punonjëse të lokalit. Në Doganën e Morinës, Shpëtimi i thotë policit kufitar se janë punonjës të cirkut dhe se po shkojnë për shfaqe artistike. Gjatë udhëtimit për Tetovë, vajzat i shpjegojnë gazetares së “Fiksit” sesi punohet dhe sesi mund të fitojë më shumë para.
Pas mbërritjes në Tetovë, gazetarja akomodohet te shtëpia ku banojnë të gjitha punonjëset e lokalit, dhe një pjesë prej tyre i kishte sjellë Shpëtimi i shoqatës artistike. Njëra nga vajzat i tregoi gazetares se edhe ajo kishte rënë prè e këtij mashtrimi nga ana e Shpëtimit, pasi ajo në të vërtet ishte në kërkim të një pune si parukiere.
Realitetin dhe punën e vërtetë e kishte kuptuar vetëm kur kishte mbërritur në Maqedoni. Në mbrëmje, të gjitha vajzat, pasi u përgatitën me veshje provokuese iu drejtuan lokalit ku zhvillohej aktiviteti. Pasi lokali u mbush me klientë, të gjitha vajzat duhet të qëndronin pranë tyre dhe të kënaqnin klientët në mënyrë që ata t’u ofronin pije.
Gazetari i “Fiksit”, i cili shkoi në lokal si klient, bisedoi me pronarin nëse mund të merrte ndonjë nga vajzat për të kaluar natën. Ai iu shpreh se kjo bëhej kundrejt pagesës prej 50 euro.
Ndiqni videon e plotë:
Burimi: Top Channel
