Historitë me sportistet që luftojnë dhe përpiqen pavarësisht çdo gjëje janë ato që na duhen në këto momente që të gjithë kemi një qëllim, të mos dorëzohemi ndaj virusit famëkeq që na ka mbyllur brenda dyerve të shtëpisë.
Ndaj sot kemi zgjedhur një histori të veçantë që ka në qendër një luftëtare si Kat, një patinatore e re që i duhet të përpiqet të kalojë ankthin dhe frikën e rrëzimit, sëmundjen bipoale nga e cila vuan dhe dramën familjare me nënën e saj single dhe motrën në shtëpi.
“Spinning Out” është krijuar nga shkrimtarja veterane Samantha Stratton, një ish-skiatore që eksploron ekstremet psikologjike të botës reale të patinazhit, të domosdoshme për trajnimin olimpik. Seriali i cili u publikua në fillim janari në Netflix, tregon sesi sëmundja mendore shihet si një helm për një sport të ndërtuar mbi feminilitetin e pacenuar.
Kat Baker (Kaya Scodelario) është një nga patinatoret më të talentuara në Sun Valley, Idaho, e cila ka qëndruar jashtë piste që kur u rrëzua dhe goditi keq kokën në garë në vitin 2017.
Një nga arsyet pse ajo ka frikë është pikërisht sepse në mendje i rikrijohet shpesh herë skena e aksidentit. Dhe sikur të mos mjaftonte kjo, Kat duhet të përballet edhe me sjelljen e çrregullt të nënës së saj Carol (January Jones), nga e cila ka trashëguar sëmundjen mendore të bipolaritetit.
Carol nga ana tjetër është një nënë e re që kishte ëndrra Olimpike deri sa mbeti shtatzënë me Kat kur ishte e re. Ajo është e përqëndruar totalisht te vajza e saj më e vogël, Serena (Willow Shields), e cila ka po aq talent sa Kat, por jo finesën e saj. Carol e shtyn Serenën të praktikojë dhe punëson një trajner të ri, me emrin Mitch (Will Kemp) i cili do të përfshihet shumë në jetët e tyre, me ose pa dashje.
Duhet të rrëzohesh që të ngrihesh sërish lart!
Kat e kryen testin për të marrë licencën si një trajnere por dështon kur përpiqet të bëjë kërcimin e trefishtë, i njëjti që i dha fund karrierës së saj konkurruese tre vjet më parë.
E tmerruar ajo largohet me idenë se karriera e saj e patinazhit ka mbaruar dhe i premton të dashurit Dave (Eli Brown) se do të bashkohet me të në Londër.
Por kur Justin Davis (Evan Roderick), një patinator i shkëlqyer në qytet dhe djali i pasanikut James David (David James Elliott), fillon të kërkojë një partnere për kërcimin në çift, ajo kthehet për të realizuar ëndrrën e saj.
Por Kat nuk dëshiron që askush ta dijë që është bipolare si nëna e saj dhe mjekohet, madje nuk i ka treguar as mikeshës së saj të fëmijërisë, Jenn (Amanda Zhou).
Nën presionin e nënës së saj me të cilën grindet dhe largohet nga shtëpia, si dhe vështirësitë financiare, Kat gjen mbështetje te trajneria e Justin-it Dasha (Svetlana Efremova) e cila e merr në shtëpinë e saj.
Dy fjalë për shëndetin mendor!
Shëndeti mendor është një çështje super e rëndësishme dhe filmi arrin të përcjellë disa mesazhe për sëmundjen bipolare, ankthin dhe depresionin që nuk funksionojnë aq mirë përballë presionit të mjedisit të patinazhit.
Kat është rritur nga një nënë bipolare dhe bashkë me motrën Serena është bërë pjesë e skenave të frikshme kur nëna e tyre i ka tmerruar në mesnatë duke i ngritur për të bërë ushtrime apo prova patinazhi.
E dëshpëruar që nuk e ka arritur vetë ëndrrën e saj, Carol mundohet të bëjë çdo gjë që të bijat të jenë perfekte, dhe e kërkon këtë me çdo kusht, edhe nëse ai do të ishte tortura.
Kat nga ana e saj gjithnjë ka qenë në mes, duke ndihmuar motrën e vogël dhe duke u përpjekur për të mos i ngjarë aspak nënës së saj.
Në një kohë që nëna ua nxjerr vajzave inatin, Kat mundohet që kur ka kriza paniku t’ia nxjerrë vetes inatin, madje edhe duke e lënduar veten. Shpesh herë ajo kafshon krahun e saj, si një mënyrë për t’u përballur me problemet!
Pastaj vjen dashuria!
Në përpjekje për t’u përballur me të gjithë këtë dramë, Kat gjendet në një trekëndësh dashurie!
Nga njëra anë i dashuri i saj që e pret në Londër, nga ana tjetër miku që është i dashuruar pas saj, Marcus (Evan Roderick) me të cilin punon në një restorant si dhe fiksimi i ri, por jo edhe aq i ri, Justin.
Me këtë të fundit Kat ka pasur një marrëdhënie që zgjati vetëm një natë. Shpesh herë asaj i kujtohen episode nga ajo natë kur ka fjetur me Justin, djaloshin pasanik që organizon festa të papara dhe duket sikur ka çdo femër në këmbët e tij.
Por çfarë ndodh kur shoqja jote ka fiksim djalin me të cilin t’i je e destinuar të përfundosh?! A mund të funksionojë një lidhje kur ka sekrete mes partnerëve dhe sekreti yt më i madh mund ta shkatërrojë atë?!
Talenti i vërtetë i aktorëve nuk lidhet aq shumë me patinazhin!
Ka një numër të madh provash dhe koreografish që janë thjesht të parealizueshme nga dy aktorët kryesorë.
Dhe prapa tyre fshihet talenti i patinatorëve të vërtetë, Walsh dhe Michaud, që janë super të famshëm në Kanada.
Shumicën e koreografisë e realizojnë profesionistët të ndihmuar nga Sarah Kawahara, një koreografe në Kanada që ka dalë në pension, por ka realizuar koreografinë për “Spinning Out”.
Në momentet e tij më të mira, “Spinning Out” na tregon sakrificat që bëjnë femrat që merren me sport, nga çrregullimet e ngrënies; shpenzimet e tepruara që destabilizojnë familjet; dëmtimet dhe lëndimet që ju rrezikojnë karrierën dhe përballjen me trajnerët grabitqarë meshkuj që mundohen të përfitojnë nga to.
Përmes 10 serive, ky serial i cili do të vijë me siguri me një sezon të dytë, na tregon gjithashtu fuqinë që kanë familjet kur bëhen bashkë! “Spinning out” është prova që frika vret më shumë ëndrra sesa dështimi, por për ta kaluar atë, të duhet një person të cilit i beson gjithçka!
/Iconstyle.al
