E kuqja mund të mos jetë ngjyra juaj e preferuar dhe as ajo që ju shkon më shumë, por këtë 8 mars, kjo çështje renditet e fundit në listë. Këtë 8 mars, gratë shqiptare do të zbukurojnë portretet e tyre me ngjyrën e flaktë për një kauzë më të madhe se moda: Ajo e dhunës ndaj grave!
“Dhuro një buzëkuq” është quajtur nisma e iniciuar nga blogerja Desantila Vatnikaj, nismë kjo që evokon një prej protestave më të bujshme për të drejtat e grave në mbarë botën. Në vitin 1912 në New York, gratë amerikane marshuan në rrugë për të kërkuar të drejtën e votës dhe Elizabeth Arden, themeluesja e kompanisë së kozmetikës me të njëjtin emër dhe ndër të parat gra që kishin një biznes të vetin në ato vite, u dhuroi atyre buzëkuqë të kuq, në shenjë pushteti.
Por sot në 2019-ën, kur të drejtat e grave janë janë ende të nëpërkëmbura dhe edicionet e lajmeve në vendin tonë gëlojnë me kronika të dhunës ndaj tyre, të gjithë ne mund të bëjmë një gjest të vogël, por tejmase domethënës, si ai i Arden.
Nëpërmjet nismës “Dhuro një buzëkuq”, secili prej nesh mund të ndihmojë në sensibilizimin ndaj problemeve që has sot një grua apo një vajzë në Shqipëri. Deri në datën 1 mars, gra dhe vajza (edhe burra, pse jo) nga e gjithë Shqipëria, do të shkëmbejnë me njëra-tjetrën buzëkuqë të kuq për të rritur ndërgjegjësimin për të drejtat e grave. “Zgjodhëm buzëkuqin, jo thjesht si simbol feminiliteti, por si ngjyrën e energjisë, emocioneve, dashurisë, pasionit…”-shkruan Vatnikaj në blogun ku ka nisur zanafilla e nismës që synon ta shndërrojë 8 marsin nga një “festë e keqkuptuar”, në një protestë elegante.
Mëposhtë, lexoni shkrimin e plotë.
Lyej botën me të kuqe!
Dhuro një buzëkuq,
Lër një shenjë,
Jep një puthje…
Do të vesh mburojën e kuqe sot, për të treguar se e kuqja është pushteti i heshtur, për të mos thënë asnjë fjalë, për të mbytur me duar gërma që do doja t’jua shquaja disave, për të folur vetëm me impaktin dhe konfidencën e buzëve të kuqe.
Do të vesh mburojën e kuqe sot, të tërheq çdo sy, të shkul vëmendjen tënde prej aty nga ku je zhytur, të të shkëlqej ditën me një buzëqeshje të fortë, të të jap një puthje.
Do të vesh mburojën e kuqe sot, për të fshirë dhimbjen e djeshme, për të fshehur tek ty lotët që derdha mbrëmë, për të veshur forcën e ringritjes, për të peshuar edhe njëherë diellin në sy, me pushtetin e heshtur të buzëkuqit.
Pastaj do të ulem në rreshtin e parë të shfaqjes me një tjetër si unë, e cila do të flasë në emrin e të gjithave ne për një mesazh: Lyej botën me të kuqe në 8 Mars.
Dita Ndërkombëtare e Gruas e cila shërben jo vetëm për bashkimin e grave pa dallim feje, race, kulture, gjuhe dhe prejardhjeje, por edhe për të kujtuar përpjekjet për barazi, paqe, drejtësi dhe ndërtim në gati 9 dekada. Është një ditë për të reflektuar mbi përparimin e bërë ndër vite, për të kërkuar ndryshime dhe për të festuar aktet e guximit dhe vendosmërisë nga gratë e zakonshme që kanë luajtur një rol të jashtëzakonshëm në historinë e vendeve dhe komuniteteve të tyre.
Ndonëse ne mendojmë se shumë ndryshime janë bërë në përfaqësimin e grave në vendimarrje e në poste drejtuese, në role kyce e në jetën sociale, jemi ende përballë një dhimbje që është plagë e shoqërisë: dhuna ndaj gruas, që fillon aty brenda mureve të shtëpisë e përfundon në muret e një institucioni.
Ndaj për të veshur botën me të kuqe, zgjodhëm buzëkuqin, jo thjesht si simbol feminiliteti, por si ngjyrën e energjisë, emocioneve, dashurisë, pasionit.
Gruaja e bën gjithçka me dashuri!
Lyej botën me të kuqe…
