Mbrëmjen e djeshme në emisionin “Ilva Now”, shefi i famshëm i kuzhinës Renato Mekolli, njoftoi se ka vendosur të lërë Shqipërinë (lexo këtu). I zhgënjyer nga situata që po përjeton në biznesin e tij që prej marrjes së masave në kuadër të luftës kundër COVID-19, Renato u shpreh në emision:
“Shikoj që nuk kam mbështetje nga shteti dhe njerëzit që na drejtojnë, situata është absurde. Do të largohem nga Shqipëria dhe ia kam vënë syrin Los Angeles. Dëshira ime është që të jap pasionin dhe dëshirën time dhe të ndjej që ajo që jap të më kthehet.”
Por teksa për dikë, Mekolli është thjesht personazhi i radhës që tenton suksesin jashtë kufijve, për ata që janë pjesë e industrisë së bareve dhe restoranteve dhe i njohin nga afër problematikat, zëri i tij është përfaqësues i qindra sipërmarrësve të ngjashëm, që për përballen me vështirësi të jashtëzakonshme.
Që prej marsit, këto biznese ose kanë qëndruar mbyllur, ose i janë nënshtruar ndryshimeve drastike për t’u përshtatur me masat e marra nga qeveria, çka sigurisht përkthehet në humbje të mëdha.
Megjithatë, sikurse shprehet dhe vetë Mekolli, nuk ka pasur kurrëfarë mbështetje nga shteti, ndonëse restorantet dhe baret po falimentojnë.
Vështirësitë e kësaj industrie i ka vënë në dukje dhe kryetari i Shoqatës së Bareve Restoranteve dhe Club-eve Enri Jahaj, i cili në një deklaratë për “iconstyle.al” ka rrëfyer se për shkak të dëmit ekonomik që ka sjellë kjo situatë, Tirana mund të humbasë 30-50 % të lokaleve (lexo këtu).
Në një letër të hapur drejtuar qeverisë, BRCA ka parashtruar 6 kërkesa thelbësore për mbijetesën e këtij sektori (lexo këtu) që është ndër më fitimprurësit në vendin tonë.
Ndër këto kërkesa, e vetmja e plotësuar deri më tani ka qenë heqja e përkohshme e taksës për zënien e hapësirës publike, por megjithatë, situata vijon të jetë tejet e rënduar dhe heshtja e institucioneve e bën të ardhemn të duket edhe më e errët.
Restorantet dhe baret funksionojnë me kapacitet shumë herë më të vogël se më parë e shumë prej tyre mbijetojnë vetëm falë shërbimit delivery, që gjithashtu paraqet problemet e veta siç janë taktikat abuzive të aplikuara nga kompanitë që ofrojnë këtë shërbim me qëllim përfitimin në një situatë kaq delikate (lexo këtu).
Historia e Mekollit që është personazh televiziv sigurisht e bën më interesante këtë çështje për audiencën që mund të mos jetë shumë e përshirë në problematikat e këtyre bizneseve.
Por ajo që duhet kuptuar është se si Renato, ka një mori sipërmarrësish që gjithashtu po reflektojnë nëse ia vlen të vijosh të qëndrosh më në Shqipëri, ku pavarësisht se kontribuon në ekonominë e vendit duke paguar taksa e duke punësuar njerëz, në një moment si ky që po përjetojmë, mbështetja është thuajse inekzistente.
