Të jesh i papunë është një pjesë normale që kalojnë miliona njerëz gjatë jetës dhe nuk duhet të demoralizohesh apo të turpërohesh nga kjo gjë.
Por nëse kjo periudhë e jetës tënde po zgjat pak si shumë, atëherë duhet të nisësh të mendosh se ku qëndron problemi. Përse nuk mund të punësohesh si shoqja jote? Mos ke shumë kërkesa ndaj vetes dhe ndaj punëdhënësit? Çfarë duhet të bësh në të tilla raste?
“Iconstyle.al” zhvilloi një sondazh për të pyetur lexuesit e faqes se përse janë ende të papunë dhe arriti në disa përfundime, që ndoshta do t’ju ndihmojnë shumë kur të jeni në kërkim për një vend pune.
1.Mos kërko vendin ideal të punës.
Nëse nuk ke punuar asnjëherë, nuk do ta dish kurrë sesi është të bësh një punë. 52% e anketuesve u shprehën se nuk kishin punuar asnjëherë, ndërkohë që 40% thanë se janë në pritje të “vendit të duhur”. Ndonjëherë duhet të rrëmbesh çfarë të vjen para dhe kështu do të krijosh edhe eksperiencën e duhur.
2.Paga e lartë nuk duhet të jetë kriteri i parë dhe i vetëm për të pranuar një punë.
34% e anketuesve e kishin pagën kusht kryesor. Nuk ka asgjë të keqe të fillosh punë me një pagë mesatare, ndërkohë që me kalimin e kohës dhe eksperiencës, ke të drejtën të kërkosh rritje rroge.
3.Nuk ka punë pa shef.
51% e personave që i ishin përgjigjur sondazhit kërkonin një shef të huaj në punë dhe jo shqiptar, ndërkohë që 28% nuk donin fare shef mbi kokë. Mund të jesh “vetë zot dhe vetë shkop”, nëse ke një punë private tënden, në të kundërt nuk ka punë pa shef.
4.Ke harruar të dërgosh CV.
Çuditërisht, 46% e pjesëmarrësve në sondazh nuk kishin dërguar asnjë CV deri më tani. Kërkim i një vendi pune online dhe dërgimi i CV-së është një nga hapat e parë që duhet të bësh nëse do të punësohesh. Tregoje se çfarë di të bësh!
5.Mos ëndërro për një punë në shtet.
Privati ka shumë mundësi për punësim dhe nëse nuk ke punuar asnjë ditë në jetën tënde, mos prit ta bësh kur të punësohesh në administratë. Thjesht hiq dorë nga rehatlliku që po kërkon!
