Thuajse 2 javë pas konfirmimit të dy rasteve të para të të prekurve me koronavirus në Shqipëri, nurmi i të prekurve ka arritur në 70 dhe deri më tani kemi dy të vdekur, ndërkohë që ekpertët e mjekësisë e po ashtu kryeministri Rama, paralajmërojnë se situata do të përkeqësohet edhe më shumë në javët në vijim.
Në një lidhje live në Facebook mbrëmjen e djeshme, kryeministri bëri publike dhe masat e para ekonomike që do të merren në këtë situatë që ai e quan një luftë të vërtetë, duke i bërë me dije shqiptarëve se po bënte ç’të mundej për të grumbulluar sa më shumë para për t’i vënë në dispozicion të sistemit shëndetësor e të gjithë atyre të prekur nga kjo epidemi.
Por teksa Rama njoftoi se kishte pezulluar e përgjysmuar konçesione për të kanalizuar të ardhurat në drejtim të emergjencës së koronavirusit, institucione të tjera si Bashkia e Tiranës dredhin zinxhirin.
Teksa të gjithë presin nga kryetari i Bashkisë Erion Veliaj që të dalë e të njoftojë reduktimin a pezullimin e ndonjë takse në një kohë kur pjesa më e madhe e bizneseve në Tiranë janë mbyllur e njerëzit janë të paqartë nëse do të marrin pagat apo jo, Bashkia e Tiranës hap një tender për suvenire.
Në dokumentin e publikuar në Agjencinë e Prokurimeve Publike më 13 mars 2020, pra pas konfirmimit të rasteve të para me COVID-19 në vend, Bashkia kërkon të blejë suvenire duke ofruar një fond limit prej 2.496.200 lekësh, shumë kjo e përafërt me koston e një ventilatori, pajisje e domosdoshme për të prekurit me koronavirus të cilëve u rrezikohet jeta.
Ndonëse në ditët në vijim pas shpalljes së këtij tenderi situata është përkeqësuar e pritet të përkeqësohet edhe më shumë, asnjë masë nuk është marrë për anullimin a pezullimin e tij, ndërkohë që në ditën e djeshme, pak para njoftimit të masave ekonomike nga Rama, lidhur me këtë tender është bërë një njoftim i ri. Në vend që të anulohej, është bërë shtyrja nga data 23 në datën 24 mars për hapjen e ofertave, meqë data 22 (e dielë) përkon me festë zyrtare dhe data 23 rrjedhimisht është pushim.
Papërgjegjshmëria e Bashkisë së Tiranës vijon më tej me tenderin për mbikqyrjen e punimeve për rikonceptimin e Kopshtit Zoologjik të Tiranës të shpallur më 13 mars me një shifër shumë herë më të lartë se ajo e suvenireve: 9.958.229 lekë.
Nuk është e qartë nëse kryeministrit dhe skuadrës së tij të ekspertëve i kanë shpëtuar nga sytë tendera të tillë absurdë në një kohë emergjence shëndetësore e ekonomike, por është e qartë se suveniret e Bashkisë së Tiranës apo Kopshti Zoologjik (për të cilin kryetari i Bashkisë mund të ishte kujtuar më herët në këto 5 vite), nuk mund të jenë aktualisht në listën e shpenzimeve të këtij qyteti.
/Iconstyle.al
