Reshjet e shumta të shiut këto ditë rrezikuan jetën e dhjetëra njerëzve, por fatmirësisht nuk u shënuan viktima. Edhe disa këngëtarë të njohur shqiptarë të cilët po udhëtonin drejt Prishtinës janë bërë pjesë e këtij rreziku, por falë Forcave të Ndërhyrjes së Shpejtë arritën të shpëtonin.
Eranda Libohova, Kejsi Tola, Kastriot Tusha dhe Zeqir Sulkuqi po udhëtonin drejt Prishtinës për të marrë avionin e linjës Prishtinë –Zyrih. Përmbytjet e shumta i bllokuan në Fushë-Krujë duke rrezikuar kështu jetën e tyre.
Në një postim në “Instagramin’ e saj, Eranda Libohova ka treguar orët e frikshme gjatë këtij udhëtimi të mbetur përgjysmë për shkak të motit të keq.
“Si fillim jam shëndoshë e mirë. Ishim nisur drejt Prishtinës për të marrë avionin e linjës Prishtinë – Zyrih. 12 vjet pa fluturuar, vendosa të sfidoj frikën… U tremba nga ajri, por uji paskësh qenë më keq. Falënderoj FNSH (forcat e ndërhyrjes së shpejtë) që më shpëtuan jetën mua e kolegëve të mi artistë, Kastriot Tusha, Kejsi Tola e Zeqir Sulkuqi. Kjo është foto me një nga efektivët e FNSH-së, Genti Hyka, mbas operacionit të shpëtimit në Fushë –Krujë.” : ka shkruar Eranda në “Instagram”.
