Ka përfunduar më në fund seriali më i preferuar në Turqi me protagonistët Can Yaman dhe Demet Ozdemir!
Mbrëmjen e djeshme u transmetua episodi i 51-të dhe i fundit i serialit në televizionin turk. Finalja përloti aktorët me fundin romantik të dashurisë së Xhanit dhe Sanemit!
Seriali i cili transmetohet në Tring me titullin “Një puthje në errësirë” është edhe ndjekur në shumë vende të botës, veçanërisht në Itali.
Pas mbylljes, aktori i njohur Can Yaman bëri një dedikim dhe falenderim për aktoren Demet Ozdemir, ndërsa e cilësoi dyshen Xhan-Sanem si më të mirën që ka parë kinematografia turke.
“‘Erkenci Kus’ nuk ishte i famshëm vetëm këtu, por në shumë vende të botës, ishte një fenomen që mori çmime, ishte unik. Nuk e di nëse një serial i tillë vjen sërish në ekran, por nëse ndodh një dyshe kaq shumë, shumë, shumë e mirë sa ne të dy është e vështirë të jetë. Falenderoj shumë Demet Ozdemir me të cilën iu përkushtuam çdo skene, mbushëm çdo boshllëk, ajo i dha energji të gjithë grupit të punës dhe na bëri të qeshim me batutat e saj”, shkruajti Can Yaman.
Pas këtij postimi ka reaguar edhe vetë Demet e cila falenderon Can-in për punën së bashku: “Gjithçka ishte e bukur së bashku, jam shumë e lumtur Can Yaman. Kisha fat që punova me ty. Të falenderoj për gjithçka. Le të jetë rruga jote e shndritshme! Nuk ka dyshim që gjëra më të bukura do të vijnë për ty!”
Can dhe Demet janë komentuar shumë për një lidhje më tepër sesa shoqërore, por nuk e ka pranuar asnjëri.
