Nëse keni kaluar në rrugët e Tiranës këto tre ditë me siguri do t’ju ketë hasur syri, të paktën një herë, meshkuj të veshur me funde. Të gjithëve na kujtojnë veshjen tradicionale skoceze dhe në fakt e tillë është.
Arsyeja? Shqipëria do të luajë kundër Skocisë, ndeshje e vlefshme për Ligën e Kombeve, të shtunën në orën 20:45.
Pavarësisht se na ndan mbi një ditë nga ndeshja, tifozët skocezë kanë pushtuar kryeqytetin dhe Shkodrën prej dy ditësh dhe për të treguar prejardhjen e tyre kanë vendosur që të bëjnë shëtitje në rrugët e vendit tonë me fustanellën tradicionale “kilt” dhe me fanellat e kombëtares së tyre.
Video e publikuar nga Olti Curri
Mësohet se një grup tifozësh i quajtur “Tartan Army” ka dhuruar një çek prej 5 mijë paund, një fondacioni shqiptar kushtuar fëmijëve me sindromën Doën, autizëm, apo nevoja të veçanta.
Grupimi ka krijuar prej rreth 15 vitesh një nismë ku shumë prej tifozëve mbledhin fonde gjatë vitit për vizitat që bëjnë në vende të ndryshme dhe sidomos ato në nevojë, duke dhënë para kryesisht për spitalet apo qendrat që merren me fëmijët që kanë nevojë për asistencë.
Përballja do të zhvillohet në stadiumin “Loro Boriçi” në Shkodër, ndërsa deri nesër pritet që të mblidhen rreth 2.000 tifozë skocezë.
