Mjeku infeksionist Pëllumb Pipero në një lidhje telefonike me “News24” ka treguar për situatën aktuale në vendin tonë.
Ai thotë se është ende herët për të përcaktuar se kur do të përfundojë e gjitha, megjithatë kurba është në rënie.
Pipero paralajmëroi qytetarët duke u thënë se kjo nuk do të thotë se kujdesi do të jetë më i ulët.
Ndonëse pas rënies së numrit të të infektuarve qeveria do të lehtësojë masat e marra, mjeku thotë se pensionistët dhe ata me probleme shëndetësore duhet të vazhdojnë të qëndrojnë në shtëpi.
“Në javët në vijim do të kemi me shumë mundësi rënie të kurbës, e cila do të shënojë fillimin e një fundi të gjatë. Kur flas për kurbë rëndëse e kam fjalën për rang kombëtar dhe jo për një qytet në veçanti. Me rënien e kurbës mendoj se edhe qeveria do t’i lehtësojë masat shtënguese, por kjo nuk do të thotë se njerëzit duhet të dalin nga shtëpia. Pensionistët dhe ata me probleme shëndetësore duhet të qendrojnë në shtëpi. Rritja e temperaturës ndihmon në uljen e transmetueshmërisë së virusit. Virusi nuk mund të rikthehet, por lë imunitet te njeriu. Këtë javë numrat e të infektuarve do të luhaten. Javën tjetër e më tej do të nisë rënia, do të kemi më pak raste”, ka thënë ndër të tjera Pipero.
Ditën e sotme në vendin tonë u regjistruan 6 raste të reja me COVID-19.
