Nëse po mendoni të bëni patentën, duhet të keni parasysh disa gjëra të reja.
Kursantët, drejtuesit e automjeteve dhe autoshkollat tashmë do të përballen me disa ndryshime në rregulloren për patentat. Amendimet, tashmë të publikuara në Fletoren Zyrtare vijnë në kuadër të “sigurisë rrugore”.
Rregullorja e re përfshin zgjatjen e vlefshmërisë së testit të teorisë deri në 1 vit, forcimin e masave shtrënguese për drejtuesit e mjeteve në bazë të pikëve, dhënien e mundësisë për kalimin nga leje drejtimi e kategorisë B në leje drejtimi të kategorisë D pas përmbushjes së kritereve të vjetërsisë prej 3 vite si dhe regjistrimin për marrjen e kategorisë A pasi ke moshës 24 vjeç.
Ekspertët e sigurisë rrugore, teksa i vlerësojnë si të nevojshme ndryshmet, kërkojnë ngritjen e strukturave për të garantuar zbatimin e tyre. Vendosja e një tjetër rregulli vlerësohet si i nevojshëm.
Aksidentet rrugore janë kthyer në problem shqetësues në vend, duke u kthyer në shkakun e tretë për numrin më të lartë të fataliteteve, për këtë arsye rregullat sa vijnë dhe bëhen më strikte.
Kujtojmë se Drejtoria e Përgjithshme e Transportit Rrugor njoftoi disa risi për vendosjen e targave të mjeteve, duke filluar nga viti 2022.
DPSHTRR thekson se “për herë të parë do të kemi targë me dimensione më të vogla, për përpara, për automjetet që kanë kufizim hapësire! Targa e re e vogël do të ketë dimensionet 360 x 100 mm (si në foto)! Shërbimi do të jetë me tarifë ekstra!”.
