Një ndër monumentet kulturore më të bukura dhe më të famshme në mbarë botën, katedralja e Parisit “Notre Dame”, u dogj në vitin 2019.
E gjithë bota u shqetësua për katedralen për të cilën u punua fort që të shpëtohej nga flakët.
Duket se mrekullia ka ndodhur, teksa tashmë po mendohet që katedralja të hapet për vizitorët në vitin 2024. Lajmin e ka dhënë ministri francez i Kulturës, Rima Abdul Malak.
Monumenti i Parisit i shekullit të 13-të mori flakë në prill të vitit 2019. Që atëherë, një projekt i madh restaurimi është kryer me synimin për ta rikthyer atë në modelin e tij të mëparshëm.
Top Albania Radio shkruan se rihapja e objektit të famshëm turistik përkon me Olimpiadën e Parisit 2024, kur mijëra spektatorë pritet të mbërrijnë në Francë. Restaurimi dhe ndërtimi i katedrales Notre Dame me kosto 850 milionë euro përfshin tri faza.
Ka përfunduar faza e parë e pastrimit të rrënojave në ambientet e brendshme dhe sigurimi i qëndrueshmërisë së objektit.
Faza e dytë përfshin punimet në kornizat dhe çatitë. Kurse rindërtimi i majës do të fillojë në fund të verës, ndërkohë që faza e tretë dhe e fundit do të fokusohet në rindërtimin e jashtëm. Është krenaria e Parisit dhe një prej atraksioneve më të njohura në botë.
Por theksojmë se Kulla Eiffel ka nevojë të dëshpëruar për riparim. Struktura e lartë prej çeliku që dominon qytetin e dritave thuhet te jetë në gjendje të mjerueshme dhe është mbuluar nga ndryshku.
Kjo bëhet e ditur në një raport konfidencial të cituar nga revista franceze ‘Marianne’.
Burimi: Top Channel
