Aktorja e njohur Amber Heard është gati të rikthehet në tapetin e kuq. Vetëm disa javë pasi konfirmoi rikthimin e saj në film, aktorja e “Aquaman” pritet të shfaqet në Festivalin e 69-të të Filmit Taormina në Siçili, më 24 qershor.
Sipas ‘Deadline’, Heard do të jetë aty për premierën e filmit të saj të ri “In The Fire”, duke e bërë këtë paraqitjen e saj të parë publike që kur ish-bashkëshorti Johnny Depp fitoi padinë e tij për shpifje kundër saj. Heard, e cila u zhvendos në Spanjë pas gjyqit shumë të publikuar, do shfaqet në tapetin e kuq me regjisorin e filmit Conor Allyn.
Aktorja luan rolin e një psikatre të ngarkuar me një “fëmijë të shqetësuar”.
Muajin e kaluar, 37-vjeçarja konfirmoi në një video të postuar në TikTok se, pavarësisht largimit nga SHBA, ajo nuk kishte në plan të linte pas karrierën e saj.
“Unë e dua shumë Spanjën,” i tha ajo një gazetari lokal në spanjisht, duke shtuar se shpreson të jetojë atje për një kohë.
Megjithatë, e pyetur nëse ka ndonjë projekt të ardhshëm filmik, aktorja e “Rum Diary” u përgjigj: “Oh, po”.
Sa i përket aktorit Johnny Depp, ai gjithashtu u rikthye së fundi në Festivalin e Filmit në Kanë, ku u prit me ovacione.
